İsrailin baş naziri Benyamin Netanyahu ölkəsinin İranın hücumunu dəf etməyi bacardığını deyib.
Qaynarinfo xəbər verir ki, baş nazir bu barədə sosial şəbəkədə açıqlama verib.
İsrail ordusu (IDF) iddia edir ki, 300-ə yaxın PUA buraxılıb, onların 99%-i ələ keçirilib. Tehran isə daha əvvəl pilotsuz təyyarələrin və raketlərin hədəflərinə çatdığını bildirmişdi.
“Biz müdaxilə etdik. Biz onları blokladıq. Biz birlikdə qalib gələcəyik”, deyə Netanyahu X sosial şəbəkəsində yazıb.
İsrail Müdafiə Qüvvələrinin sözçüsü Daniel Haqari jurnalistlərə bildirib ki, İran İsrailə 170 pilotsuz uçan aparat və 30 qanadlı raket atıb, lakin bir dənə də olsun mərmi ölkənin hava məkanına daxil olmayıb, digər ölkələrin əraziləri üzərindən vurulub.
Həqarinin sözlərinə görə, İsrail Hərbi Hava Qüvvələri tərəfindən 25 qanadlı raket vurulub.
İsrail ordusunun məlumatına görə, İran 120 ballistik raket atıb. Onlardan bəziləri İsrail müdafiəsindən yan keçərək ölkənin cənubundakı aviabazaya zərbələr endirib. Bununla belə, infrastruktura cüzi ziyan dəydiyi və aviabazanın normal şəkildə fəaliyyət göstərdiyi bildirilir.
Bundan əlavə, İsrail ordusunun məlumatına görə, İraq və Yəməndən buraxılan pilotsuz təyyarə və ya raketlərin heç biri ölkənin hava məkanına daxil olmayıb.
İran aprelin əvvəlində Dəməşqdəki İran konsulluğuna edilən hücuma cavab olaraq İsrailə qarşı onlarla raket və pilotsuz uçan aparat atıb. ABŞ prezidenti Co Bayden bildirib ki, İsrail ordusu Amerika hərbçilərinin dəstəyi ilə gələn mərmilərin demək olar ki, hamısını vurmağa nail olub.
