21 noyabr axşamı adi, gözəl bir ailə axşamı olmalı idi. Amma bunun əvəzinə ailəmizdə faciə baş verdi.
Kiçik övladım möcüzə nəticəsində xilas oldu – həkimlərə minnətdaram, ilk dəqiqələr həlledici idi. Hələ də xəstəxanadayıq, özümüzə gəlməyə çalışırıq. Körpə oksigen aparatına qoşulub, əks halda saturasiya düşür.
Tribuna-nın məlumatına görə, bu sözləri Yasamal rayonunda yaşayış binasında baş verən yanğın zamanı həyat yoldaşı Samir Məhəmmədovu itirən Marta Ramazanova paylaşıb. O bildirib ki, bu gün artıq 6-cı gündür və hələ də bədənindən qara his, qurum çıxır:
“4 yaşlı uşağın ağciyərlərində nələrin baş verdiyini təsəvvür etmək belə dəhşətlidir.
Saçlarımdan o qorxunc axşamın iyi hələ də getmir, hər saniyə həmin gecəni xatırladır.
Bu isə buzdağının yalnız görünən hissəsidir. Dəm qazı ilə zəhərlənmənin nəticələrinin gələcəkdə bizə necə təsir edəcəyini hələ bilmirik.
Amma baş verə biləcək ən dəhşətlisi oldu: İdeal ata, sevən ər, əla dost, məsuliyyətli işçi və nəhayət, ölkəsinin ləyaqətli vətəndaşı həyatdan köçdü. O, artıq yoxdur.
Bir axşamda bütün həyatımız dəyişdi. Və təkcə bizim yox…
Balaca Arzu — mələk kimi bir qız, oğlanlarımın dostu — o da artıq yoxdur.
Biz — həmin binanın sakinləri — indi evsiz-eşiksiz kimi yaşayırıq. Əşyalarımızı paketlərə, çamadanlara yığırıq. Harada gəldi sığınırıq. Yaşamağa yerimiz yoxdur. Yeni ili harada və necə keçirəcəyimizi bilmirik.
Və bundan da betəri — kimlərsə artıq heç vaxt tam tərkibdə olmayacaq…
Uşaqlar baş verənləri başa düşmürlər. “Atamız haradadır, nə vaxt evə qayıdacağıq?” deyə soruşurlar. İndi onlara nə cavab verəcəyimi bilmirəm.
Amma sonra izah etməli olacağam ki, bütün bunların səbəbi atalarının ədalət axtarması idi. O, bunu dəfələrlə etməyə çalışdı, amma onu eşitmədilər.
Ümid edirəm ki, bu sonuncu dəfə o, nəhayət ki, eşidiləcək.
Günahkarlar qanunun bütün sərtliyi ilə cəzalandırılmalıdır!”.
Gülşən Rəsul
