Bakının Babək prospektində hərəkətin təşkilində dəyişiklik edilib. Məqsəd günün pik saatlarında sıxlığı azaltmaqdır. Bəs dəyişiklik hərəkətin intensiv olduğu yolda effektiv olubmu?
Tribunainfo.az Xəzər TV-yə istinadən xəbər verir ki, artıq Babək prospektinin Oqtay Vəliyev küçəsi ilə kəsişməsində hərəkət işıqforla tənzimlənir.
Yəni NZS qəsəbəsindən ”Koroğlu” metrostansiyası istiqamətində nəqliyyat vasitələrinin hərəkəti üçün keçid yeri qoyulub.
Görülən işlər çərçivəsində kəsişmədəki ayırıcı zolaq ləğv edilib. Nizamlanan yeni yolayrıcı və eyni səviyyəli piyada keçidləri təşkil edilib. Müvafiq yol nişanları və nişanlanma xətləri çəkilib. İnfrastruktur işləri görülüb, yeni səki və panduslar inşa olunub.
Dəyişikliklə Oqtay Vəliyev küçəsi vasitəsilə Babək prospektinin şimal və cənub hissəsi əlaqələndirilib. Nəqliyyat vasitələrinin yürüş məsafəsi 2, 5 km qısalıb. Babək prospektindəki mövcud geriyə dönmə yerlərinin nəqliyyat yükü 50 faizə qədər azalıb.
