Bəli, əsas futbol mövsümü başa çatdıqdan sonra, bütün futbol ictimaiətinin, azarkeşlərin və jurnalistlərin diqqəti, 17 iyun-2 iyul arasında Rusiya Federasiyasında keçirilən Konfederasiyalar kubokuna yönəlib. 
Bəli, əsas futbol mövsümü başa çatdıqdan sonra, bütün futbol ictimaiətinin, azarkeşlərin və jurnalistlərin diqqəti, 17 iyun-2 iyul arasında Rusiya Federasiyasında keçirilən Konfederasiyalar kubokuna yönəlib.
Konfederasiyalar kubokunda müvafiq olaraq UEFA, KONMEBOL, KONKAKAF, KAF, AFK və OFK bayrağı altında keçirilən qitə birinciliklərinin qalibləri, son dünya çempionu və təşkilatçı ölkə iştirak edir. 1997-ci ildən bəri ilk dəfə olaraq, turnirin son qalibi Braziliyə yığması birincilikdə iştirak etməyəcək. Bu turnir, bir il sonra keçiriləcək mundiala repetisiya xarakteri daşıyır və əvvəlki dövrlərin təcrübəsinə görə, iştirakçı ölkələr bu yarışa ikinci dərəcəli yarış kimi baxırlar.
Lakin, bu birincilik tam fərqli və unikal məqamları üzə çıxardı. Əvvəla, elə ilk oyunlardan sonra məlum oldu ki, bu ilki Konfederasiyalar kubokunda oyunlar əvvəlki dövrlərdəki ilə müqayisədə qat-qat maraqlı və gərgin keçəcək. Hətta, sönük təsir bağışlayan axırıncı Avropa çempionatından sonra iştirakçı komandaların nümayiş etdirdiyi açıq hücüm futbolu hər kəsə zövq verir.
Turnirdə Çili, Almaniya, Meksika, Portuqaliya kimi kifayət qədər güclü yığmaların tərkibində Criştiano Ronaldo, Arturo Vidal, Aleksis Sançes, Çiçarito, Nani, Kuareşma kimi ulduzlar iştirak edir. Almanların yarışmaya ikinci, bəlkə də üçüncü heyətlə qatılması futbol azarkeşlərinin kefinə bir az soğan doğrayıb. Amma, futbol aləminə “alman maşını” terminin gətirmiş bu ifrat dərəcədə dəqiq və intizamlı millətdən istənilən sürprizi gözləmək mümkündür.
Rusiyada keçirilən Konfederasiyalar kuboku tarixə düşəcək qeyri-adi bir hadisə ilə də tarixlərdə qalacaq. İlk dəfə burada, mübahisəli epizodlar zamanı videotəkrarlardan istifadə olunmasına rəsmən icazə verilib. Texnoloji yenilikərin futbola qaydalarına müdaxiləsi futbolda yeni bir eranın başlanğıcı deməkdir. Əlbəttə, mənim subyektiov fikrimdir, amma mən bu yeniliyi təqdir edirəm.
Vüsal Bağırlı
