Uşaqlarda piylənmə son bir neçə onillikdə qlobal narahatlığa çevrilmiş ciddi sağlamlıq problemidir. Uşaq və yeniyetmələrdə piylənməyə səbəb olan əsas amillər var. Piylənmə və artıq çəki heç də ancaq artıq yeməklə bağlı yaranmış problem deyil. Həkim pediatrlar bildirib ki, uşaqların piylənmədən və artıq çəkidən əziyyət çəkməməsi üçün diqqət etməli olduğumuz məqamlar var.
Tribunainfo.az xəbər verir ki, həkimlərin fikrincə, əsas piylənmə səbəbi qeyri-sağlam qidalanmadır. Hazır qidalar, şəkərli içkilər və yüksək kalorili qəlyanaltılarla zəngin qidalanma artıq kalori qəbuluna yol açır.
-Fiziki fəaliyyətin olmaması: gününün çoxunu televiziya, kompüter, planşet başında keçirmək fiziki fəaliyyət imkanlarını azaldır.
-Genetika: genetika uşağın piylənməyə meylliliyində rol oynaya bilər. Valideynlər və ya yaxın qohumlar artıq çəkilidirsə, uşağın da piylənmə ehtimalı yüksək ola bilər.
-Valideyn təsiri: pəhriz və fiziki fəaliyyətlə bağlı valideyn vərdiş və davranışları uşağın çəkisinə böyük təsir göstərə bilər.
-Psixoloji faktorlar: emosional stress və digər psixoloji faktorlar həddindən artıq yemək istəyi və çəki artımına səbəb ola bilər.
-Marketinq və reklam: uşaqlara yönəlmiş zərərli qida və içkilərin təşviqi onların qida seçimlərinə təsir edə bilər.
Uşaqlarının pəhrizindən narahat olan valideynlər bu barədə daha ətraflı ailə həkimləri və ya patronaj tibb işçiləri ilə məsləhətləşə, vaxtında tibbi müayinələrdən keçə bilərlər.
