Ukraynanın müqavimət hərəkatında iştirak edən Azərbaycan kökənli daha bir döyüşçü həlak olub. Sosial medianın Ukrayna seqmentində onun son mənzilə yola salınma videosu yayılıb.
Musavat.com bildirir ki, səsləndirilən musiqi ukraynaca olsa da, əslində Azərbaycanın dövlət himnidir! Bu çox təsirli səhnə hazırda sosial mediada və saytlarda onminlərlə insan tərəfindən paylaşılır.
Odessada yaşayan soydaşımız Anar Natiqoğlu bildirib ki, Ukrayna uğrunda həlak olan döyüşçünün atası əslən Qazax rayonundandır. O, Nikolayev cəbhəsində şəhid düşüb. Məlumatda bildirilir ki, hazırda onun qardaşı və qardaşı oğlu da əlində silah, Ukraynanın azadlığı uğrunda döyüşürlər.
Həlak olan şəxs İsmayılov Rüstəm İsmayıl oğludur. Onun atası, əslən Qazaxın Yuxarı Salahlı kəndindən olan İsmayıl İsmayılov SSRİ vaxtında hərbçi olub. Təyinatını Ukraynaya alıb. Orada işləyib və ukraynalı Svetlana xanımla ailə qurub. Onların övladı olan Rüstəm Ukrayna uğrunda şəhid olub!
