“Qarabağdan Uçhisara könül körpüsü: Azərbaycan-Türkiyə Qardaşlıq Gecəsi” keçirilib.
“Qarabağdan Uçhisara könül körpüsü: Azərbaycan-Türkiyə Qardaşlıq Gecəsi” keçirilib.
TİA.AZ xəbər verir ki, millət vəkili Qənirə Paşayevanın rəhbərlik etdiyi Avrasiya Beynəlxalq Araşdırmalar İnstitutu İB, Uçhisar Bələdiyyəsinin təşkilatçılığı ilə baş tutan gecədə Uçhisar bələdiyyə başqanı Aki Karaarslan, millət vəkili Q.Paşayeva, bölgənin millət vəkilləri, partiyaların rəsmiləri, QHT və KİV rəhbərləri və çoxlu sayda yerli sakin iştirak edib.
Gecədə çıxış edən Uçhisar bələdiyyə başqanı Aki Karaarslan millət vəkili Q.Paşayevanın təşəbbüsü və onun rəhbərlik etdiyi Avarsiya Beynəlxalq Araşdırmalar İnstitutu İB-nin dəstəyi ilə tarixi Kapadokyada Qarabağ küçəsi açılışı və “Qarabağdan Uçhisara könül körpüsü: Azərbaycan-Türkiyə Qardaşlıq Gecəsi”nin keçirilməsindən və bu işə dəstək verməkdən böyük məmunluq duyduqlarını deyib. Bələdiyyə başqanı Azərbaycan və Türkiyə əlaqələrinin möhkəm bağlarla bağlandığını dilə gətirib. Onun sözlərinə görə bu cür gecələrin təşkili dostluq və qardaşlığımızın göstəricisidir. Daha sonra söz millət vəkili Qənirə Paşayevaya verilib. O, hər iki ölkənin birliyinin göstəricisi olan gecədə birlik və qardaşlıq münasibətilə hər kəsi təbrik edib. “Türkiyənin uğuru bizim və bütün türk dünyasının uğuru, bizim uğurumuz Türkiyənin və bütün türk dünyasının uğurudur”. Türkiyənin hər bir uğuruna Azərbaycanın uğuru kimi sevindiyimizi deyən millət vəkili Q.Paşayeva Türk dünyasının ağırı açılarından da danışıb:” Azərbaycan torpaqlarının 20%- i Ermənistan tərəfindən işğal edilib və bu işğal bu gün də davam edir. İşğal nəticəsində 1 milyondan çox soydaşımız yurd-yuvasından didərgin düşüb. Onlar hələ də evlərinə dönə bilmədikləri üçün vətən həsrəti çəkir. Azərbaycan torpaqlarının Ermənistanın işğalından azad etmək və o insanların öz doğma torpaqlarına qayıtmağı üçün Azərbaycan və Türkiyənin güclərini daha da birləşdirəcəyinə inanıram. İnşaallah bu cür tədbirləri gələcəkdə Dağlıq Qarabağda, Xankəndidə, Şuşada, Kəlbəcərədə və digər o gözəl torpaqlarda qeyd edək”. Azərbaycan və Türkiyənin birliyindən bəhs edən gecədə millət vəkili Qənirə Paşayevanın rəhbərliyi ilə qardaş ölkəyə səfər edən Azərbaycanın Əməkdar Artisti Aybəniz Haşımova, sənətçi İlham Əsgəroğlu, istedadlı gənc sənətçi Aynişan Quliyeva, gənc muğam ifaçısı Nicat Kapadokya, Uçhisarlıları Azərbaycan musiqisi ilə heyran ediblər. Gecə alqışlara qarşılanıb. Gecənin sonunda sənətçilərlə birlikdə hər kəs “Çırpınırdı Qara dəniz baxıb Türkü bayrağına” əsəri və “Qarabağ şikəstəsi”ni oxuyublar. Uçhisar bələdiyyə başqanı deyib ki, bundan sonra hər il belə bir gecənin keçirilməsinə çalışacaqlar. Millət vəkili Q.Paşayeva isə deyib ki hər il qədim Kapadokyada belə bir gecənin baş tutması üçün dəstək göstərməyə hazırıq və inanırıq ki Uçhisarlılar bu gün olduğu kimi hər zaman Azərbaycan mədəniyyətini alqışlarla qarşılayacaqlar. Millət vəkili Q.Paşayeva da Uçhisar bələdiyyə başqanı Aki Karaarslana Azərbaycan mədəniyyəti ilə bağlı hədiyyələr təqdim edib. Tədbirlər Prezident Yanında QHT-lərə Dəstək Şurasının dəstəyi ilə keçirilib.
İlahə
