Ali Məhkəmədə Göygöldə xuliqanlıqda təqsirləndirilən Allahverdi Məmmədovun (şərti) barəsindəki qərardan verilən kassasiya şikayəti üzrə məhkəmə iclası yekunlaşıb.
Pravda.az-ın əldə etdiyi məlumata görə, hakim Ələsgər Novruzovun sədrliyi ilə keçirilən prosesdə qərar elan olunub.
Qərara əsasən, kassasiya şikayəti qismən təmin edilib, Gəncə Apellyasiya Məhkəməsinin çıxardığı qərar ləğv olunub və cinayət işi apellyasiya instansiyası məhkəməsində yeni məhkəmə baxışına təyin edilib.
İttihama görə, hadisə 27 may 2023-cü il tarixdə, saat 17 radələrində Göygöl rayonu ərazisində yerləşən “Fərid” restoranının həyətyanı sahəsində qeydə alınıb.
Belə ki, Allahverdi Məmmədov həmin restoranda keçirilən toy məclisində iştirak edən zərərçəkmiş Maarif Əsədovun (şərti) onun arvadından söz soruşub. Təqsirləndirilən şəxs isə bunu bəhanə gətirərək onunla mübahisə edib. Daha sonra o, bıçaqla qəsdən Maarifin sağ bud nahiyəsinə bir dəfə zərbə vuraraq, ona xəsarət yetirib.
Hadisədən sonra Allahverdi Məmmədov cinayət məsuliyyətinə cəlb edilib.
Göygöl Rayon Məhkəməsinin hökmü ilə o, CM-in 221.3-cü maddəsinin əlamətləri olmadığından onun əməlinin həmin məcəllənin 221.3-cü maddəsindən 128-ci maddəsinə tövsif edilmişdi. Hökmə əsasəm, Allahverdi Məmmədovun cinayət işi üzrə cinayət təqibinə xitam verilib, cinayət məsuliyyətindən azad edilib, barəsində seçilmiş başqa yerə getməmək haqqında iltizam qətimkan tədbiri ləğv olunmuşdu. Gəncə Apellyasiya Məhkəməsinin qərarına əsasən, şikayət təmin edilməyib, protest isə təmin olunub, Göygöl Rayon Məhkəməsinin çıxardığı hökmü ləğv edilib. Təqsirləndirilən şəxs Cinayət Məcəlləsinin (CM) 221.3-cü maddəsi ilə təqsirli bilinərək 2 il müddətinə azadlıqdan məhrum edili. Allahverdi Məmmədov barəsində seçilmiş başqa yerə getməmək haqqında iltizam qətimkan tədbiri həbs qətimkan tədbiri ilə əvəz edilməklə məhkəmə iclas zalında dərhal həbsə alınıb.
