“Gələcəkdə tələbələrin yataqxana xərcləri üçün də kredit verilə bilər”.
“Gələcəkdə tələbələrin yataqxana xərcləri üçün də kredit verilə bilər”.
AzVision.az xəbər verir ki, bunu Maarifçi” Tələbə Kredit Fondunun icraçı direktoru Rüfət Mahmud deyib.
O bildirib ki, rayonlardan gələn tələbələrin təhsil haqqından əlavə, yaşama yerləri ilə bağlı bir çox problemləri olur. “Bunu nəzərə alaraq tələbələrə yataqxana xərcləri üçün kredit verilməsi məsələsinə də baxılacaq. Sonrakı müddətlərdə hətta hansısa tədqiqat, araşdırma işlərində də kömək edilə bilər”.
R.Mahmud onu da qeyd edib ki, bu gün kreditlərin qaytarılması mexanizmi sabit qrafiklə hesablanır: “Lakin bir çox ölkələrdə gəlirə bağlı olan qrafiklər, mexanizmlər mövcuddur. Bu gün bizim üçün bunu tətbiq etmək bəlkə də bir qədər tezdir. Biz bunu bir çox dövlət qurumları ilə birgə işləyib hazırlamalıyıq. Amma gələcəkdə bu mexanizmin olmasını istisna etmirik”.
O, eyni zamanda, hazırda ailə başçısını, valideynlərini itirmiş və valideyn himayəsindən məhrum olan, sağlamlıq imkanları məhdud tələbələrə kreditlərin güzəştli şərtlərlə verildiyini xatırladıb: “Kreditlərin faiz dərəcəsi 6 faizdən 8 faizədək dəyişir. Kreditin qaytarılma müddəti 5 ildən 10 ilə qədərdir. Amma qaytarılma üçün tələbələrə təhsil müddəti bitdikdən sonra müəyyən güzəşt müddəti də verilir. Nəzərdə tutulur ki, o müddət ərzində tələbə hansısa işlə təmin olunsun.Ödənişlər güzəşt müddəti bitdikdən sonra olmalıdır. Tələbəyə maksimum 7 min manat kredit verilir. Bu, sosial bir layihədir və burada tələbələrdən hər hansı zamin və ya girov tələb olunmur”.
İcraçı direktor deyib ki, hazırda Azərbaycanda ali təhsilin bakalavr pilləsi üzrə tələbələrə kreditlər verilir. Lakin gələcəkdə digər təhsil dərəcələrinə görə kreditlərin verilməsi mümkün olacaq
