“Biz tez-tez xarici dövlərdə, hətta bəyənmədiyimiz Rusiyada belə görürük ki, dövlət əhəmiyyətli böyük yollar çəkilir, amma hansısa vətəndaş öz evinin satılmasından narazı qalaraq köçməyib, yol düz onun evinin ətrafından keçir, mülkiyyətinə toxunmayıblar. Dünyanın bütün yerlərində mülkiyyət müqəddəs sayılır. Xüsusi dövlət əhəmiyyətli işlər zamanı belə evin sökülməsi barədə məhkəmələr qərar verə bilərlər. Bu da o zaman ola bilər ki, qarşı tərəf razılıq versin. Hətta məhkəmələr də vətəndaşların mülkiyyət hüququnu gözləməlidirlər. Eyni zamanda bu, çoxmənzilli binalara da aiddir. Ola bilər, sakinlərin bir çoxu söküntüyə razı olur, digərləri yox. “Qarayev Residence” kimi tanınan “Kursus-Nizami” MTK-nın Nizami rayonu, Kamil Balakişiyev küçəsindəki sökdüyü binalarla bağlı məhkəmə çəkişmələrini eşitdim. Məhkəmənin yekun qərarı olmadan söküntü işləri aparmaq yolverilməzdir. Əgər vətəndaşların mənzillərinin bərpası ilə bağlı qərarlar veriləcəksə, bu, mütləq həyata keçirilməlidir. Nəyin bahasına olursa-olsun, məhkəmənin qərarı icra olunmalıdır”.
Bu sözləri Pravda.az-a açıqlamasında sabiq deputat, Vəhdət Partiyasının sədri Tahir Kərimli deyib.
“Ümumiyyətlə, xüsusi dövlət əhəmiyyətli işləri çıxmaq şərti ilə heç bir sahibkar, hətta dövlət orqanı vətəndaşların hüquqlarını 1% belə poza bilməz. Hər kəs buna hörmətlə yanaşmalıdır. Necə ola bilir ki, xeyli sayda ev sahibinin mənzili öz razılığı olmadan əlindən alınsın, sökülsün, onlara kompensasiya da kifayət qədər verilməsin. Belə başa düşürəm ki, tək şikayət bu deyil. Həmin sakinlər bildirirlər ki, zəlzələdə belə evləri fəsad görməyib. Belə olan halda nə üçün sakinlərin hüquqları gözlənilməyib, onlara həssas yanaşılmayıb. “Kursus” MTK rəhbərliyini dəvət edirəm ki, vətəndaşların şikayətlərinə həssas yanaşsın, məhkəmə qərarını icra etsin. Özlərini sakinlərin yerinə qoysunlar. Su, qaz, elektrik kəsilsə, kommunal xidmətlərə maneələr yaradılsa, evlərində hansı həyəcanı keçirərlər? Tərəfləri bir-birilərini anlamağa dəvət edirəm ki, məsələ kiçik həcmdə də olsa, sosial partlayışa səbəb olmasın, əhalidə ciddi qarşıdurma və narazılıq yaratmasın”, – o bildirib.
Qeyd: MTK-nın “Sədərək” ticarət mərkəzinin rəhbəri Yusif Qədimbəyliyə məxsus olduğu bildirilir.
