“Görülən bütün işlərin fonunda bəzi məmurların Sizin tapşırıqlarınızı yerinə yetirilməsində yol verdiyi nöqsanlar təəssüf doğurur”
Redaksiyamıza Sumqayıt şəhərində Qarabağ əlillərinə qarşı baş verən özbaşınalıqla bağlı “Qarabağ Qaziləri”, “Vətən Müharibəsi Əlilləri” birliklərinin, “Azərbaycanın Milli Qəhrəmanı Asif (Fred) Məhərrəmov” adına İnkişaf Fondunun və “Qaziler.az” saytının ölkə Prezidenti İlham Əliyevə müraciəti daxil olub. Sumqayıtda Qarabağ əlillərinə qarşı baş verən qanunsuzluqdan, ədalətsizlikdən, rəsmi müraciət olunmasına baxmayaraq, Respublika Prokurorluğunun bu işə biganə qalmasından söz açılan məktubu oxucuların diqqətinə təqdim edirik:
“Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev cənablarına! Hörmətli cənab Prezident!
Əvvələ qeyd etmək istəyirik ki, təməli Ulu öndərimiz Heydər Əliyev cənabları tərəfindən qoyulan və onun ləyaqətli davamçısı olan Sizin tərəfinizdən yüksək səviyyədə davam etdirilən Azərbaycan Respublikasının ərazi bütövlüyü uğrunda gedən döyüşlər zamanı şəhid olanların yaxınlarına və yaralanaraq sağlamlığını itirmiş müharibə əlillərinə göstərilən xüsusi diqqət və qayğı vətənimiz uğrunda xüsusi xidməti olan insanların hamısının ürəyincədir. Bu qəbildən olan insanları təmsil edən İctimai Birliklər olaraq aparılan islahatların uğurlu nəticələrini izləməkdə və alqışlamaqdayıq. Məmnuniyyətlə bildirmək istəyirik ki, görülən işlərin daha da uğurlu olması üçün İctimai birliklərində bu məsələlərə cəlb edilməsi vətəndaş cəmiyyətinin qurulmasında xüsusi əhəmiyyət kəsb edir.
Cənab Prezident!
Görülən bütün işlərin fonunda bəzi məmurların Sizin tapşırıqlarınızı yerinə yetirilməsində yol verdiyi nöqsanlar təəssüf doğurur. Sumqayıt şəhəri İcra Hakimiyyətinin başçısı Zakir Fərəcov və onun təyin etdiyi Sumqayıt şəhər İcra Hakimiyyəti nəzdində Sumqayıt nəqliyyat MMC-nin sədri Rüstəmov Xannı aşkar korrupsiya və rüşvətxorluq əməlləri ilə məşğul olaraq Sumqayıt şəhər əhalisi arasında ciddi narazılığa səbəb olmuşdur. Şəhərdə nəqliyyat islahatı aparılması adı altında çirkli oyunlar quran Sumqayıt nəqliyyat MMC heç bir hədd və hüdud tanımır. Sumqayıt nəqliyyat MMC-nin sədri Xannı Rüstəmov vətənimizin ağır günlərində könüllü olaraq cəbhə bölgəsinə getmiş və orada Sumqayıt şəhərinin adını ucaldaraq torpaqlarımız uğrunda canlarını qurban verən müharibə əlillərinə qarşı xüsusi qəddarlığı ilə fərqlənməkdədir. O, 1998-ci ildən etibarən 11(on bir) nəfər Qarabağ əlilləri və şəhid ailələri tərəfindən təsis edilmiş və Sumqayıt şəhər əhalisinə nümunəvi xidməti ilə seçilən 2(iki) saylı marşrutun müharibə əlillərinin əlindən zorla alınmasında tutduğu vəzifəsindən sui istifadə etməkdədir. Aşkarca rüşvət tələb edən və əlillər tərəfindən ödənilən 4000 (dörd min) manatlıq aylığa qane olmayan bu harınlamış rüşvətxorun əməlləri nəticəsində müflisləşərək aciz duruma düşmüş Qarabağ əlillərini həyatlarından bezdirməyə nail olmuşdur.
Bizə müraciət edən Sumqayıtlı Qarabağ əlilləri hüquqi cəhətdən heç bir mübarizə yolu qalmadığını hesab edərək (onlar faktlarla bağlı Baş prokurorluğa müraciət etmiş və heç bir nəticə ala bilməmişlər) yaxın gələcəkdə problemlərini şəxsən Sizin diqqətinizə çatdırmaq məqsədilə aclıq aksiyasına başlayacaqlarını bildirmişlər.
Biz İctimai Birlik rəhbərləri olaraq bu hadisənin baş verməməsi üçün Sumqayıt şəhər İcra Hakimiyyətinin başçısı Zakir Fərəcovla görüşərək problemin həllinə çalışmaq niyyətindəyik. Lakin hesab edirik ki, Ali Baş Komandamız olaraq şəxsən Sizin dəstəyinizə ehtiyacımız vardır.
Möhtərəm Prezident!
Sizin rəhbərliyiniz ilə son illər Azərbaycanda xüsusilə qeyri neft sektorunda sahibkarlıq fəaliyyətinin inkişafı ilə bağlı aparılan islahatlar nəticəsində ölkəmizin iqtisadiyyatı analoqu olmayan inkişaf yolu keçmişdir. Bu inkişafdan bəhrələnən Sumqayıtlı Qarabağ əlilləri 2012-ci ildə öz fəaliyyətlərini daha da səmərəli etmək və sərnişin daşımada yüksək tələblərə cavab verən avtobusların alınması üçün bankdan külli miqdarda kredit götürərək yeni avtobuslar almışlar. Ən pisi də odur ki, onlar kreditlərini ödəyib qurtarmamış onların sahibkarlıq fəaliyyətinə ağır zərbə vurulmuşdur.
Cənab Prezident!
Siz özbaşınalıq edən məmurlara qarşı çox sərtsiniz. Hesab edirik bu yerdə də sərt ölçü götürməyinizə zərurət vardır. Odur ki, xahiş edirik Sumqayıt şəhərində baş verən və Qarabağ əlillərini son dərəcə çıxılmaz vəziyyətə salan qanun pozuntusunu araşdırmaq və baş vermiş rüşvətxorluq və korrupsiya hallarını həyata keçirən cinayətkarların cəzalandırılması üçün Respublika Baş Prokurorluğuna müvafiq tapşırıqlar verəsiniz.
Əvvəlcədən təşəkkür edirik.”
Təşkilat rəhbərləri yaxın günlərdə Sumqayıt şəhər icra hakimiyyəti başçısı Zakir Fərəcoğvla görüşüb məsələni müzakirə etmək üçün ona da müraciət ünvanlayıblar!
