Bu cür səssiz, sakit bir qız bütün ölkəyə səs saldı.
Tribunainfo.az xəbər verir ki, bunu Aktauda aviaqəzada həlak olan təyyarə bələdçisi Hökümə Əliyevanın iş yoldaşı Leyla Rzayeva deyib.
O bildirib ki, Hökümə Əliyeva öz vəzifə borcunu ləyaqətlə yerinə yetirib, bunun üçün də hamının qürur yeridir: “Hökümə kimi sakit, səssiz bir qızın qəhərli, həyəcanlı səslə sərnişinlərə təlimat verib, onları sakitləşdirməyə, ümid verməyə çalışması inanılmazdır. Özü də qəza enişi olacağını bilə-bilə…”, o qeyd edib.
Təyyarə bələdçisi sərnişinlərə də çağırış edib: “Biz – təyyarə bələdçilərinin əsas vəzifəsi sərnişinlərin təhlükəsizliyini təmin etməkdir. Sərnişinlərin sağlamlığı bizim məsuliyyətimizdədir. Təyyarə bələdçilərinin təlimatlarını diqqətlə dinləyib, əməl etmək lazımdır.
Bilirsiniz, təyyarədə qəza enişi planlı və planlaşdırılmamış olur. Bütün hallarda pilotlar bu barədə bələdçilərə bildirirlər. Bu qəza enişinin planlı, yoxsa planlaşdırılmamış olduğunu isə bilmirəm”.
Qeyd edək ki, insanlar Hökum Əliyevanın xatirəsini yad etmək üçün onun yaşadığı binanın qarşısına gəlir, xatirə lövhəsinin qarşısına gül dəstələri düzürlər.
Xatırladaq ki, Hökumə Əliyeva II Fəxri xiyabanda dəfn olunacaq.
