10 il əvvəl – 2015-ci ilin ortalarında Azərbaycanda çəkisi 5 qram olan 750 əyarlı qızıl üzük 221 manata satıldığı halda, hazırda 832 manata satılır.
Tribunainfo.az Yeniavaz.com-a istinadən xəbər verir ki, son 10 il ərzində çəkisi 5 qram olan 750 əyarlı qızıl üzük 3,8 dəfə bahalanıb.
Əgər, hər hansı bir şəxs 10 il əvvəl 100 min manat vəsaiti sərmayə kimi qızıl alışına yatırsaydı, hazırda həmin şəxsin 280 min manat gəliri olacaqdı.
Eyni dövrdə – 2015-ci ilin ortalarında 100 min manata mənzil alan şəxsin gəlirləri daha az olacadı. 10 il əvvəl paytaxt Bakının təkrar mənzil bazarında mənzillərin kvadratmetrinin orta qiyməti 1 630 manat olub. Hazırda isə təkrar mənzil bazarında bir kvadratmetrin orta satış qiyməti 2100 manat təşkil edir. 2015-ci ildə 100 min manata alınan 61,4 kvadratmetrlik mənzilin hazırkı dəyəri 129 min manata bərabərdir. 10 il ərzində ayda orta hesabla 300 manat kirayə gəlirini də (cəmi 36 min manat) bunun üzərinə əlavə etsək ümumi gəlir təxminən 65 min manat olacaqdı.
Rəqəmlərdən də göründüyü kimi, son 10 ildə qızılın gəlirliliyi mənzilin gəlirliliyindən 4,3 dəfə çox olub.
