Səhiyyə Nazirliyi bir gündə keçirdiyi 5 tenderin nəticələrini açıqlayıb. Tribunainfo.az xəbər verir ki, nazirliyin bütün tenderlərinin qalibi bir şirkət olub.
Həmin tenderlərdən biri Qaradağ rayonu, Lökbatan qəsəbəsində tikintisi başa çatdırılmamış “240 çarpayılıq xəstəxana tikintisi” obyektinin mühafizəsi, orada saxlanılan əmlakın təhlükəsizliyi və qorunması ilə bağlıdır. “TİİM” MMC ilə bağlanılmış müqavilənin dəyəri 72.700,27 manat təşkil edir.
Bu şirkət həmçinin Mərkəzi Neftçilər Xəstəxanası üçün mühafizə xidmətini də həyata keçirəcək. Bu məqsədlə MMC-yə 178.701,37 manat ödəniləcək.
Üçüncü tender isə Qazax Mərkəzi Xəstəxanasının mühafizəsinin təşkildir. “TİİM” MMC udduğu bu tenderə görə, 93.850,59 manat qzanacaq.
Gəncə Narkoloji Dispanser üçün keçirilən müsabiqənin də qalibi eyni şirkət olub. Onlar da mühafizəni “TİİM”ə etibar ediblər. Və müqabilində şirkətə 66 min manat ödəyəcəklər.
Analoji vəziyyət Şirvan Mərkəzi Xəstəxanası üçün də keçərlidir. Tribunainfo.az bildirir ki, bu səhiyyə ocağının mühafizəsini də TİİM MMC reallaşdıracaq və tərəflər arasında 93.850,07 manatlıq müqavilə bağlanıb.
Tribunainfo.az-ın açıq mənbələr üzərindən apardığı araşdırma nəticəsində belə məlum olub ki, “TİİM” MMC sistemli olaraq səhiyyə sahəsindəki mühafizə tenderlərinin qalibi olub. Belə ki, ötən il bu şirkətin Səhiyyə Nazirliyi ilə bağladığı müqavilələrin dəyəri bir neçə milyon manat olub. 2020-2022-ci illərdə də vəziyyət fərqli olmayıb. Bu şirkət nazirlikdən hər il milyonlarla manat qazanıb.
Səhiyyə Nazirliyinin TİİM-ə mühafizəyə dair bütün tenderlərini verməsinin konkret səbəbi məlum deyil. Nazirliyin rəhbərliyi ilə mühafizə şirkətinin başında duran şəxsin hansı əlaqələrə malik olması da bəlli deyil.
Nəzərinizə çatdıraq ki, TİİM MMC 03.06.2011-ci il tarixdə İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsində dövlət qeydiyyatına alınıb. MMC-nin hüquqi ünvanı Bakı şəhəri, Nərimanov rayonu, Zeynal Xəlil ev 14, nizamnamə kapitalı 10 manatdır. MMC-nin qanuni təmsilçisi Manafov İlham Sabir oğludur.
İlham Manafov haqqında açıq mənbələrdə hər hansı məlumat yoxdur.
Səhiyyə Nazirliyi “TİİM” MMC ilə 500 minlik müqavilə bağladı
