Mayın 30-da Şamaxıda “Sabir poeziya günləri” çərçivəsində ənənəvi tədbir keçirildi.
Mayın 30-da Şamaxıda “Sabir poeziya günləri” çərçivəsində ənənəvi tədbir keçirildi.
Tədbirdə Azərbaycan Yazıçılar Birliyinin sədri, xalq yazıçısı Anar, “Sabir poeziya günləri” təşkilat komitəsinin sədri Əjdər Ol, Azərbaycan Yazıçılar Birliyinin üzvü şair Əhməd Qəşəmoğlu, Azərbaycan Yazıçılar Birliyinin katibi Yaşar Məcid, əməkdar artist Ağalar Bayramov və respublikanın digər tanınmış şair və yazıçıları, həmçinin Cənubi Azərbaycandan gəlmiş qonaqlar iştirak etmişlər.
Tədbir iştirakçıları əvvəlcə Ulu Öndər Heydər Əliyevin abidəsini ziyarət edərək abidə önünə tər çiçəklər düzmüşlər. Daha sonra M.Ə.Sabirin və S.Ə.Şirvaninin qəbirüstü abidələri ziyarət edildikdən sonra tədbir Mədəniyyət Mərkəzində davam etmişdir.
Tədbiri giriş sözü ilə şair Əjdər Ol açmış, bu bayramın tarixindən, əhəmiyyətindən geniş bəhs etmişdir. Daha sonra Şamaxı Rayon İcra Hakimiyyətinin başçısı Asif Ağayev çıxış edərək Sabir poeziya bayramı münasibətilə tədbir iştirakçılarını təbrik etmiş, Azərbaycan ədəbiyyatının əvəzolunmaz nümayəndəsi olan Mirzə Ələkbər Sabirə göstərilən dövlət qayğısından, ustad sənətkara olan sonsuz ehtiramdan, xalq məhəbbətindən söz açmışdır.
Sonra çıxış edən AYB-nin sədri, xalq yazıçısı Anar 1961-ci ildən başlayaraq hər il şairin doğum günündə keçirilən “Sabir poeziya günləri”nin əhəmiyyətindən danışmış, Azərbaycan ədəbiyyatının əvəzolunmaz nümayəndəsi Mirzə Ələkbər Sabirə xalq məhəbbətindən söz açmış, Sabirin damarlarında azərbaycanlı qanı axan hər bir vətəndaşımız üçün əbədi qürur mənbəyi olduğunu vurğulamışdır.
Tədbirdə AYB-nin üzvü şair Əhməd Qəşəmoğlu, AYB-nin katibi Yaşar Məcid, Cənubi Azərbaycandan olan şair Sayman Aruz və digər şair və yazıçılar çıxış edərək şairin keçdiyi çətin həyat yolundan, yaradıcılığından və ömür yolunun müxtəlif məqamlarına toxunaraq onun satiralarını müsəlman Şərqində bir intibah, oyanış kimi qiymətləndirmiş, Sabir poeziyasının ölməzliyini, bənzərsiz söz ustadının bir çox fikirlərinin hər zaman aktual olduğu diqqətə çatdırılmış, onun şeirlərinin Azərbaycan ədəbiyyatında mühüm yer tutduğu vurğulanmışdır.
Tədbirdə şairin nəvəsi Sevda Tahirli, qiraət ustası, əməkdar artist Ağalar Bayramov şairin şeirlərini səsləndirmiş, aşıq Məharət Habiloğlunun ifasında aşıq mahnıları, xanəndə Habil Şıxəliyevin ifasında muğam və xalq mahnıları səsləndirilmişdir.
