“Bizi polislə hədələyirlər”
Sabirabad rayon icra hakimiyyətinin başçısı Nazim İsmayılov kəndlilərin örüş sahəsini qanunsuz olaraq satıb.
Bu barədə AzEuroNews.com–a məlumat verən rayonun Çöl Dəllək kənd sakinləri bildiriblər ki, bir müddət əvvəl onlara məxsus olan və mal-qaralarını otarmaq üçün istifadə etdikləri örüş sahələrində kimliyi bilinməyən adamlar peyda olub.
Az keçməyib ki, örüş sahələrində traktorlar görünməyə başlayıb. İcra başçısının örüş sahələrini satdığı adamlar ərazini şumladaraq əkin işlərinə başlayıblar.
Kənd sakinləri deyir ki, artıq bir neçə gündür ki, mal-qaralarını otaramaq üçün gəldikləri örüş sahələrində kimli məlum olmayan şəxslərin təzyiqi ilə qarşılaşırlar.
“Bizi polislə hədələyirlər”
Örüş sahələrini itirən kəd sakinləri bildiriblər ki, həmin adamlar onları əraziyə nəinki buraxmır hətta, polislə hədələyirlər: “Sonuncu dəfə konkret olaraq bizə dedilər ki, bir də bura gəlsəniz polis şöbəsinə aparılacaqsınız. Onların bu hədəsinə fikir vermədik. Yarım saat keçərdi ki, ərazidə polislər göründü. Biz də, örüş sahəmizdən uzaqlaşmaq məxburiyyətində qaldıq”.
Sabirabad rayon icra hakimiyyətinin başçısı Nazim İsmayılov
Örüş sahələrini itirən kənd sakinləri şikayət üçün getdikləri rayon icra hakimiyyətində isə, ögey münasibətlə qarşılaşıblar: “Biz icra başçımız Nazim İsmayılovla görüşmək istədik. Əvvəlcə səbəbini soruşdular. Örüş sahələrimzlə bağlı dedikdə, başçının bizi qəbul etmək istəmədiyini bildirdilər. İndi biz, dərdimizi kimə deyək? Mal-qaramızı harada otaraq? Axı niyə bu məmurlaq imkan vermir ki, kasıb evinə bir tikə çörək aparsın?”.
“Örüş sahəsinin ələ keçirənlərə Müslim Rzayev havadarlıq edir”
Narazı kənd sakinləri deyir ki, örüş sahəsini qanunsuz ələ keçirib əkin işləri aparanlara Çöl Dəllək kənd bələdiyyəsinin sədri Müslim Rzayev havadarlıq edir: “Görünür həmin adamlar Müslim Rzayevə möhkəm “hörmət” ediblər. Belə olmayasadı əl-ayağa düşməzdi. Bizim kəndin bələdiyyə sədri olsa da, bizim maraqlarımızı qorumaq əvəzinə tanımadığımız kənardan gələn və örüş sahələrimizi ələ keçirən adamları müdafiə edir. Onun barəsində icra hakimiyyətinə yazdığımız şikayət məktubuna da cavab vermir, konkret hansısa tədbir görmürlər”.
Mövzu ilə bağlı Sabirabad Rayon İcra Hakimiyyəti və Çöl Dəllək kənd bələdiyyəsi ilə əlaqə saxlamaq cəhdlərimiz heç cürə alınmadı.
Qarşı tərəfin də mövqeyini öyrənib dərc etməyə hazırıq.
TIA.AZ
