“Yabloko” lideri Qriqori Yavlinski Rusiya prezidenti Vladimir Putinlə görüşdə Ukrayna ilə hərbi əməliyyatları dayandırmaq üçün danışıqlar aparmağa hazır olduğunu açıqlayıb.
Qaynarinfo xəbər verir ki, bu barədə partiyadan oktyabrın 26-da Kremldə keçirilən görüşün yekunlarına dair bildirilib.
“Atəşkəs Yavlinskinin prinsipial mövqeyidir. “Yabloko” lideri hesab edir ki, atəşkəslə bağlı danışıqlara mümkün qədər tez başlamaq lazımdır və bu danışıqlarda şəxsən iştirak etməyə hazırdır”, – partiyanın press-relizində deyilir.
“Yabloko”nun rəsmi məlumatında həmçinin qeyd olunur ki, Putinlə Yavlinski arasında söhbət zamanı Ukraynadakı müharibə mövzusu əsas mövzuya çevrilib. Bundan əlavə, onlar “qlobal iqtisadi sistemin fraqmentasiyası kontekstində” Rusiya iqtisadiyyatının problemlərinə toxunublar. Eyni zamanda, tərəflər 2024-cü il prezident seçkilərini müzakirə etməyiblər, – “Yabloko” vurğulayıb.
Qeyd edək ki, daha əvvəl siyasətçinin mətbuat katibi İqor Yakovlev Yavlinskinin 2024-cü ilin martında keçiriləcək prezident seçkiləri ilə bağlı prezident administrasiyası ilə heç bir danışıqlar aparmadığını iddia edib. Onun sözlərinə görə, Yavlinskinin fikrincə, hazırda “ölkədə vəziyyət elədir ki, prezidentliyə namizədin irəli sürülməsi təşəbbüsü xalqdan gəlməlidir”. Ona görə də o, namizədliyinin irəli sürülməsinin mümkünlüyünü nəzərdən keçirməyə hazırdır, bir şərtlə ki, onun iştirakı üçün “ən azı 10 milyon imza toplansın”.
“Yabloko”nun rəhbəri Nikolay Rıbkov qeyd edib ki, partiya hələ seçkilərə namizəd irəli sürmək barədə qərar qəbul etməyib. “Ciddi müzakirə gedir, federal siyasi komitədə, partiyanın qurultayında müzakirələr olacaq. İştirakın lehinə və əleyhinə olan arqumentlər çox əhəmiyyətlidir”, – deyə o vurğulayıb.
Yavlinski 2018-ci il prezident seçkilərində namizədliyini irəli sürərək 1,05% səs toplayıb. “Vedomosti”yə prezident administrasiyasına yaxın dörd mənbə bildirib ki, Kreml liberal qüvvələrdən olan namizədə qarşıdan gələn seçkilərdə iştirak etməsini ehtimal edirlər. Onlar Venediktovu misal çəkiblər. Həmsöhbətlərdən birinin fikrincə, belə bir namizədin iştirakının nəticəsi cəmiyyətdə hər kəsin Putinin siyasətini dəstəklədiyini göstərməli, Ukraynadakı müharibə isə davam etməlidir.
