PSJ bu bazar günü Kilian Mbappe üçün vida mərasimi keçirməyi planlaşdırır.
Bu barədə “El Chiringuito” məlumat yayıb. Paris klubunun prezidenti Nasser Əl-Xelaifi 25 yaşlı forvardın komanda və azarkeşlərlə necə vidalaşmaq istədiyini öyrənmək üçün ona zəng edib.
Həmçinin bazar günü, mayın 12-də Luis Enrikenin komandası Liqa 1-in 33-cü turu çərçivəsində evdə “Tuluza”nı qəbul edəcək.
Xatırladaq ki, Mbappe PSJ-dən ayrılacağını dünən açıqlayıb. O, 2018-ci ilin yayında “Monako”dan PSJ-yə transfer olunub. Bu müddət ərzində Mbappe bütün turnirlərdə 306 matçda iştirak edib, 255 qol vurub və 108 qolun ötürməsini verib. Həmçinin forvard paytaxt klubu ilə birlikdə altı dəfə Fransa çempionu, 3 dəfə ölkə kubokunun və Superkubokunun qalibi olub.
