“PalSüd”ün işçilərinə 1 milyon manat borcunun olması və ötən 7-8 ay ərzində zavod işçilərinin aksiya keçirməsi barədə xəbər verilirdi. 
“PalSüd”ün işçilərinə 1 milyon manat borcunun olması və ötən 7-8 ay ərzində zavod işçilərinin aksiya keçirməsi barədə xəbər verilirdi.
Təxminən 20 gün əvvəl isə şirkətlə müqavilə əsasında çalışan süd qəbul məntəqələrinin 60-a yaxın işçisinin ümumilikdə 1 milyon manat dəyərində olan borca görə etiraz etdiyi bildirilir.
Bununla bağlı “Palfood” MMC bəyanat yayıb. Bəyanatı təqdim edirik.
“Palfood” MMC bəyan edir ki, şirkətin əməkdaşları və süd təchizatçıları tərəfindən güya şirkətə qarşı etirazların edilməsi barədə yayılan xəbərlərin heç bir əsası yoxdur. Bütün bunlar keçmişdə baş vermiş və ən əsası, şirkətlə heç bir əlaqəsi olmayan olayın KİV-də tamamilə fərqli şəkildə təqdim edilməsinim nəticəsidir. Bildiririk ki, “Palfood” MMC ölkənin ən iri süd məhsulları istehsalçılarından biri olmaqla xam südü ölkənin iri fermer təsərrüfatlarından müqavilə və təhvil-təslim aktları əsasında alır. Süd alımı ilə əlaqədar bütün hesablaşmalar vaxtı-vaxtında həyata keçirilməklə təchizatçılarla uğurlu işgüzar münasibətlər qurulmuşdur. Təchizatçılarımız tərəfindən hər hansı etirazın olması, sözsüz ki, mümkün deyil.
O ki qaldı xəbərin işçilərə dair hissəsinə, bu məlumat da həqiqətdən uzaqdır. Zavodumuz uzun illərdir ki, ölkəmizin cənub bölgəsinin ən iri işəgötürən müəssisələrindən biri olaraq qalır. Zavodumuzun kollektivi stabil və effektiv şəkildə işini həyata keçirir ki, hər bir kəs ölkəmizdə istehsal olunan təbii və keyfiyyətli süd məhsullarını əldə etmək imkanına malik olsun.
Şirkətimiz Azərbaycan prezidenti cənab İlham Əliyevin regionların sosial-iqtisadi inkişafına dair göstərişləri əsasında yaradılan ilk özəl müəssisə olub. Fəxrlə qeyd edirik ki, milli valyutanın iki devalvasiyası və digər iqtisadi faktorlara rəğmən tərəfimizdən məhsulların qiymətlərində şişirdilmə olmamış, həmçinin işçilərin ixtisarı siyasətinə əl atılmamışdır. Bundan əlavə, xüsusi icazələr almaqla, şirkətimiz istehsal etdiyi məhsulların xarici ölkələrə ixracına da diqqət ayırıb. Bizim fəaliyyətimiz iqtisadi şəraitə rasional yanaşmanın, ölkə hakimiyyəti tərəfindən təsdiq edilmiş iqtisadi kurs çərçivəsində dövlətlə effektiv qarşılıqlı fəaliyyətin əsasında həyata keçirilir. Bir neçə gün öncə dövlət başçısı növbəti dəfə yerli biznesə dəstəyin vacibliyini bildirdi və bu istiqamətdə müvafiq göstərişlərini verdi. Lakin görünən odur ki, bu cür əsassız və yoxlanılmamış məlumatların yayılması yerli iri özəl istehsalçının reputasiyasına mənfi təsir göstərilməsi cəhdinin daha bir təəssüfverici nümunəsidir. Hesab edirik ki, biznesin ve qeyri-neft sektorunun inkişafının xüsusi diqqət mərkəzində saxlandığı belə bir dövrdə bu tipli məlumatların KİV-də yayılması bilavasitə dövlətin siyasəti və iqtisadi siyasətinə qarşı yönəlmiş addımdır.
Bu kimi xəbərlərə böyük təəssüf hissi ilə yanaşır və onların yayılmasının arxasında duran səbəblərdən asılı olmayaraq bəyan edirik ki, bütün bunlar bizə öz işimizi davam etdirməyə heç bir maneə törədə bilməz”.
