Los-Ancelesdəki yanğınlarda Billi Kristal, Mendi Mur və Peris Hilton da daxil olmaqla bir çox məşhurların evləri yanıb.
Tribunainfo.az xarici KİV-ə istinadən xəbər verir ki, yanğında milyonlarla dollarlıq evlərin məhəllələri ilə əhatə olunmuş, məşhur gəzinti sahəsi olan Temeskal Kanyonu da yanıb.
Məşhur aktyor Billi Kristal və həyat yoldaşı Cenis Kristal 45 illik evlərini itirdiklərini açıqlayıb: “Cenis və mən 1979-cu ildən eyni evdə yaşayırıq. Uşaqlarımızı, nəvələrimizi burada böyütmüşük. Evimizin hər qarışı sevgi ilə dolu idi. Bura ilə bağlı çox gözəl xatirələrimiz var. Əlbəttə ki, qəlbimiz qırılıb, amma biz uşaqlarımızın və dostlarımızın sevgisi ilə bunun öhdəsindən gələcəyik”.
Hollivud filmlərinin tanınmış simalarından biri olan Keri Elves də instaqram səhifəsində ailəsinin yaxşı olduğunu, lakin evlərinin yandığını yazıb: “Təəssüf ki, biz evimizi itirdik, lakin həqiqətən də bu dəhşətli yanğından sağ çıxdığımız üçün minnətdarıq”.
Qeyd edək ki, yanğın baş verən ərazidə evləri olan digər ulduzlar arasında Adam Sendler, Ben Afflek, Tom Henks və Stiven Spilberq də var.
