NATO Müttəfiq Quru Qoşunları Komandanlığının Türkiyədə 30 Avqust Zəfər Bayramı və Türk Silahlı Qüvvələr Günü münasibəti ilə qeyd etməsinə Yunanıstandan reaksiya gəlib.
Tribunainfo.az İndependent-ə istinadən xəbər verir ki, LANDCOM-un Twitter hesabında edilən paylaşımda türkcə “Zəfər bayramınız mübarək” sözləri yer alıb.
Baş ofisi İzmirin Buca rayonunda yerləşən LANDCOM-un postunun davamında “Bu özəl gündə bizi qəbul etdiyi üçün Türkiyəyə təşəkkürümüzü bildiririk” deyilib.
Yazıda o da bildirilib ki, Türkiyə 1952-ci ildə NATO-ya üzv olduqdan sonra bir çox əməliyyatlarda iştirak edərək böyük peşəkarlıq nümayiş etdirib.
Paylaşıma reaksiya verən Yunanıstanın NATO-dakı daimi nümayəndəsi Yannis Miltiadis Nicolaidis diplomatik şikayət etdi. Nikolaidis Türkiyə Silahlı Qüvvələri Gününün müttəfiq ölkə üzərində qələbə günü ilə əlaqələndirilməsinin “qəbuledilməz” olduğunu müdafiə edib.
LANDCOM ötən il avqustun 30-da oxşar paylaşım etmişdi, lakin Afina administrasiyasının tənqidindən sonra yazı sosial media hesablarından silinmişdi.
Mesajın silinməsinə Türkiyə də reaksiya verdi, bunun üzərinə LANDCOM 1 sentyabrda yeni təbrik mesajı paylaşdı.
