NATO-nun Priştinadakı komandiri bildirib ki, Kosovodakı NATO qüvvələri son qarşılaşmalara bənzər zorakılıq aktları sülhü təhdid edərsə, istənilən vəziyyətlə üzləşməyə hazırdır.
Tribunainfo.az Mehrnews-a istinadən xəbər verir ki, Kosovonun şimalında üç bələdiyyə binasını müdafiə edən NATO-nun 30-a yaxın sülhməramlı əsgəri mayın sonunda serb etirazçılarla toqquşmalarda yaralanıb.
1999-cu ildə müharibə bitəndən bəri Kosovonu qoruyan NATO əlavə 700 hərbçi yerləşdirmək və daha bir batalyonu yüksək hazırlıq vəziyyətinə salmaq qərarına gəlib və qüvvələrini təxminən 4511 nəfərə çatdırıb.
KFOR kimi tanınan NATO qoşunlarının komandanı Angelo Mişel Ristuccia qərargahından bir qrup jurnalistə deyib: “Biz hər cür şəraitlə üzləşməyi planlaşdırırıq. Buna görə də əlavə qüvvələr aldıq. Biz reaksiya vermirik, hərəkət edirik”.
O bildirib ki, son günlər nisbi sakitliyə baxmayaraq, vəziyyət çox gərgin olaraq qalır.
“Hazırda hərbi həll yolu yoxdur, çünki bu vəziyyəti həll etməyin yeganə yolu hər iki tərəfin münasibətlərini normallaşdırmaq iradəsinə əsaslanan siyasi qərardır. Amma ilk növbədə gərginliyi azaltmaq lazımdır”, – Ristuccia deyib.
Qeyd edək ki, etnik serblərin məskunlaşdığı Kosovonun şimalında ölkənin 2008-ci ildə Serbiyadan müstəqilliyini elan etməsindən bəri ən pis gərginlik yaşanıb.
