Rusiya hökuməti Rusiya ordusuna potensial çağırışçıların və səfərbər olunanların ölkəni tərk etmələrinin qarşısını almaq üçün sistem hazırlayır.
Tribunainfo.az xəbər verir ki, bu barədə Britaniya Müdafiə Nazirliyi məlumat yayıb.
Məlumatda qeyd olunur ki, iyulun 11-də Rusiyanın “Meduza” müstəqil media təşkilatı Rusiya hökumətinin Müdafiə Nazirliyi ilə Federal Təhlükəsizlik Xidməti (FTX) arasında potensial çağırışçılar haqqında ətraflı məlumatı FTX Sərhəd Xidmətinə ötürmək və onların ölkədən qaçmasının qarşısını almaq üçün “informasiya mübadiləsi sistemi” tətbiq etdiyini bildirib. Bildirilir ki, sistem 2024-cü ilin payızına qədər tam işlək olmalıdır.
Britaniya kəşfiyyatının məlumatına görə, Rusiya hər il iki çağırış keçirir və hər il 250 mindən çox insanı bir illik icbari hərbi xidmətə çağırır.
“2022-ci ildə qismən səfərbərlik elan edildikdən sonra yüz minlərlə Rusiya sakini ölkəni tərk edib, onların arasında gənc və yüksək təhsilli insanlar qeyri-mütənasib şəkildə təmsil olunur və bu, əmək bazarına mənfi təsir göstərib”, – Britaniya Müdafiə Nazirliyi qeyd edir.
Nizami Bağırov
