Məşhur “YouTuber” Azərbaycandakı “yaşıl inqilab”dan danışdı (VİDEO)

Dünyaca məşhur “YouTuber” Nuseir Yassin X sosial şəbəkəsində Azərbaycanla bağlı maraqlı post paylaşıb.

Tribunainfo.az xəbər verir ki, Nuseir Yassin səhifəsinə Azərbaycanın neft sənayesi və “yaşıl enerji”nin tətbiqinə dair maraqlı videoçarx yerləşdirərək yazıb:

“Yaşıl inqilab” rəsmi olaraq hər yerdədir. Neft hasil edən ilk ölkə olan Azərbaycandan təzəcə qayıtdım. Və təxmin edin nə gördüm? BƏƏ ilə böyük əməkdaşlıq sayəsində onlar ən böyük günəş parkını yenicə açdılar. Biz dünyanı belə dəyişirik”.

Nuseir Yassin, daha çox “Nas Daily” adı ilə tanınan, 9 fevral 1992-ci ildə İsrailin Arraba şəhərində anadan olmuş israilli-fələstinli video blogerdir. Harvard Universitetində iqtisadiyyat üzrə təhsil alıb və 2014-cü ildə məzun olub. 2016-cı ildə işini tərk edərək dünyanı səyahət etməyə başlayıb və 1000 gün ərzində hər gün bir dəqiqəlik videolar çəkərək “Nas Daily” “Facebook” səhifəsində paylaşıb. Bu videolar qısa müddətdə böyük populyarlıq qazanmış və milyonlarla izləyici toplayıb. 2019-cu ildə “Around the World in 60 Seconds: The Nas Daily Journey” adlı kitabını nəşr etdirib. Hazırda Nuseir Yassin “Nas Academy” adlı video yaradıcılığı məktəbi və “Nas Studios” adlı video istehsal studiyası ilə fəaliyyətini davam etdirir.