Azərbaycanın BMT-yə üzvülüyünün 25 illiyi münasibətilə keçirilən tədbirlərə qatılmaq məqsədilə Nyu-Yorkda səfərdə olan xarici işlər naziri Elmar Məmmədyarov BMT-nin Baş katibi Antonio Quterreşlə görüşüb.
Azərbaycanın BMT-yə üzvülüyünün 25 illiyi münasibətilə keçirilən tədbirlərə qatılmaq məqsədilə Nyu-Yorkda səfərdə olan xarici işlər naziri Elmar Məmmədyarov BMT-nin Baş katibi Antonio Quterreşlə görüşüb.
Azərbaycan Xarici İşlər Nazirliyinin mətbuat xidmətindən TİA.AZ verilən məlumata görə, görüşdə Azərbaycan və BMT arasında münasibətlərin hazırkı durumundan məmnunluq ifadə olunub.
E.Məmmədyarov Azərbaycan Prezidenti İlham Əliyevin salamlarını A.Quterreşə çatdırıb. A.Quterreş Prezident İlham Əliyevlə görüşlərini məmnunluqla xatırladığını deyərək, onun salam və xoş arzularının çatdırılmasını xahiş edib.
Nazir Azərbaycanın müstəqilliyinin ilk illərində BMT və onun ixtisaslaşmış təşkilatlarının Azərbaycana dəstəyinin, xüsusilə Ermənistanın təcavüzü nəticəsində qaçqın və məcburi köçkün vəziyyətinə düşən vətəndaşlarımızın humanitar problemlərinin həll edilməsi məqsədilə göstərdiyi yardımların yüksək qiymətləndirildiyini diqqətə çatdırıb.
E.Məmmədyarov, həmçinin Azərbaycanın BMT Nizamnaməsi və beynəlxalq hüququn prinsipləri və məqsədlərinə sadiq olduğunu və BMT-nin fəaliyyətinə dəstək və töhfə verdiyini qeyd edib. Azərbaycanın 2015-ci ildə keçirilən Dayanıqlı İnkişaf Sammitində 2016-2030-cu illər üçün təsdiqlənmiş Dayanıqlı İnkişaf Məqsədlərinə qoşulduğunu deyən E.Məmmədyarov Prezident İlham Əliyevin Dayanıqlı İnkişaf üzrə Milli Əlaqələndirmə Şurasının yaradılması haqqında fərman imzaladığını xatırladaraq, bu Şuranın 2030-cu ilə qədər qlobal inkişaf məqsədləri və hədəfləri çərçivəsində milli prioritetlərin və göstəricilərinin müəyyən edilməsi, müvafiq dövlət proqramlarının dayanıqlı inkişaf məqsədlərinə uyğunlaşdırılması üzrə məsul olduğunu qeyd edib.
XİN rəhbəri Azərbaycanın inkişaf etməkdə olan, həmçinin daha az inkişaf etmiş, təbii fəlakətlərlə üzləşmiş ölkələrin ehtiyaclarının qarşılanmasına xüsusi diqqət yetirdiyini deyib və bu illər ərzində müxtəlif regionlardanolan bir sıra ölkələrə Heydər Əliyev Fondu və Xarici İşlər Nazirliyi nəzdində Azərbaycan Beynəlxalq İnkişaf Agentliyi (AİDA) vasitəsilə humanitar və digər yardımlar göstərildiyini vurğulayıb.
E.Məmmədyarov Azərbaycanın 2017-2019-cu illər üçün BMT-nin İqtisadi və Sosial Şurasına üzv seçilməsinin Azərbaycana beynəlxalq inkişafa töhfə vermək üçün əlavə imkan yaradacağını deyib.
Azərbaycan hökuməti tərəfindən milli və beynəlxalq səviyyədə mədəniyyətlərarası və dinlərarası dialoqun təşviqinə xüsusi diqqət yetirildiyini deyən nazir bu xüsuda 2016-ci ilin “Multikulturalizm ili”, 2017-ci ilin isə “slam Həmrəyliyi ili” elan edildiyini əlavə edib. Həmçinin, 2016-ci ilin aprel ayında Azərbaycanın Sivilizasiyaların Alyansının VII Qlobal Forumuna ev sahibliyi etdiyini diqqətə çatdırıb.
Azərbaycan-BMT əlaqələrinin inkişaf tarixində Azərbaycanın BMT Təhlükəsizlik Şurasına qeyri-daimi üzv seçilməsi, həmçinin ölkəmizin BMT TŞ-na sədrlik etməsinin xüsusi əhəmiyyət daşıdığını vurğulayıb.
Nazir, həmçinin Cənubi Qafqaz regionunda sülh və təhlükəsizliyə əsas təhdid olan Ermənistan-Azərbaycan münaqişəsinin sülh yolu ilə nizamlanmasında BMT-nin rolundan bəhs edərək, münaqişənin həlli üçün baza sənədlərinin də məhz BMT Təhlükəsizlik Şurası tərəfindən qəbul edilmiş müvafiq qətnamələr olduğunu bildirib. Bu qətnamələrin tələblərinin hələ də yerinə yetirilməməsinin təəssüf doğurduğunu əlavə edib. Nazir münaqişənin həlli üçün substantiv danışıqların davam etdirilməsinin vacibliyini vurğulayıb.
A.Quterreş Azərbaycanın BMT-nın təşəbbüslərində və proqramlarında yaxından əməkdaşlığının və münasibətlərin dərinləşməsi istiqamətindəki səylərinin yüksək qiymətləndirildiyini bildirib və əməkdaşlıq üçün perspektiv vəd edən sahələrin müəyyən edilməsində bu kimi görüşlərin vacib olduğunu qeyd edib.
Görüşdə həmçinin qarşılıqlı maraq doğuran məsələlər haqqında fikir mübadiləsi aparılıb.
