Lənkəran Ağır Cinayətlər Məhkəməsində yol qəzası törətməkdə təqsirləndirilən Esmira Binnətəliyevanın cinayət işi üzrə məhkəmə iclası başa çatıb.
Pravda.az-ın əldə etdiyi məlumata görə, hakim Cavid Səfərlinin sədrliyi ilə keçirilən prosesdə hökm oxunub.
Məhkəmənin hökmü ilə o, cəzasını məntəqə tipli cəzaçəkmə müəssisəsində çəkməklə 5 il müddətə azadlıqdan məhrum edilib.
İttihama görə, hadisə 29 yanvar 2025-ci il tarixdə, saat 13:50 radələrində Zərdab-Ağcabədi yolunun Ağcabədi rayonu, Nəcəfqulubəyli kəndi ərazisində keçən hissəsində qeydə alınıb.
Belə ki, Esmira Binnətəliyeva alkoqollu içkilərin qəbulu nəticəsində sərxoş halda, sürücülük vəsiqəsi ilə idarə etdiyi özünə məxsus “Hyundai Accent” avtomobillə hərəkətdə olarkən yolun sağ kənarında (ehtiyat hissəsində), 1 metr əsas yoldan sağda duran və etibarnamə əsasında idarə etdiyi avtomobilini saxlayaraq qapısını açaraq düşən Rafiq Məmmədovu vurub. Nəticədə kişi hadisə yerində ölüb.
Hadisədən sonra Esmira Binnətəliyeva saxlanılaraq cinayət məsuliyyətinə cəlb edilib.
Məhkəmədə Esmira Binnətəliyeva özünü təqsirli bilərək ifadəsində göstərib ki, sürücülük təlim məktəbində müəllim işləyib. O bildirib ki, qan azlığından əziyyət çəkdiyindən həkimin məsləhəti ilə yarım stekan çaxır içib: “Sonra yaşadığım evdən çıxıb Ağcabədi rayonu, Hüsülü kəndində 40 mərsimində iştirak etmək üçün yola düşdüm. Həmin gün saat 13:50 radələrində maşınla hərəkətdə olarkən nəqliyyat hissəmin arxasında hərəkətdə olan “QAZel” markalı avtomobil ötmə əməliyyatına keçdi. Bu səbəbdən də həmin avtomobilə şərait yaradılmasından ötrü maşınımı yolun sağ kənarına çəkdim. Həmin vaxtı yol kənarında dayanmış “Mercedes Benz” markalı avtomobilin sürücüsünün qəfildən maşının qapısını açıb düşüdüyünü gördüm. Həmin an dərhal ayağımı əyləcə sıxsam da, sürücüsünü maşınla vurub yol-nəqliyyat hadisəsini törətdim”.
Təqsirləndirilən şəxs hazırda tutduğu əməldən peşman olduğunu, zərərçəkmiş şəxsin hüquqi varisi ilə barışdığını deyərək, məhkəmədən ona yüngül cəza verilməsini xahiş edib.
