Qaradağ Rayon Məhkəməsində qəsdən sağlamlığa yüngül zərər vurmada təqsirləndirilən Taryel Quliyevin (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Şəfa Dadaşovanın sədrliyi ilə keçirilən prosesdə hökm oxunub.
Məhkəmənin hökmü ilə o, cinayət məsuliyyətindən azad edilib və barəsində olan cinayət təqibinə xitam verilib.
İttihama görə, hadisə 15 iyul 2025-ci il tarixdə, saat 18:00 radələrində paytaxtın Qaradağ rayonu ərazisində qeydə alınıb.
Belə ki, Taryel Quliyev yaşadıqları evdə keçmiş arvadı, zərərçəkmiş Turanə Əkbərova (adı, soyadı şərtidir) ilə şəxsi münasibətlər zəminində mübahisə edib. Bu zaman o, əl və ayaq zərbələri ilə qadının üz və ayaq nahiyələrinə vuraraq ona bədən xəsarəti yetirib.
Hadisədən sonra Taryel Quliyev saxlanılaraq cinayət məsuliyyətinə cəlb edilib.
Turanə Əkbərova məhkəməyə ərizə təqdim edərək, təqsirləndirilən şəxs ilə barışdığını, ona dəymiş zərərin tamamilə ödənildiyini, ondan şikayət və tələbinin olmadığını bildirib. Qadın keçmiş əri barəsində olan məhkəməyədək sadələşdirilmiş icraat materialı üzrə cinayət təqibinə xitam verilməsini məhkəmədən xahiş edib.
