Ukrayna Prezidenti Vladimir Zelenskinin ofisinin keçmiş rəhbəri Andrey Yermak istefasından bir neçə saat sonra cəbhəyə getmək niyyətində olduğunu bəyan edib.
Tribuna xəbər verir ki, bu barədə Yermak “New York Post” qəzetinə məktubunda bildirib.
“Cəbhəyə gedəcəyəm və istənilən repressiyaya hazıram. Zelenskiyə problem yaratmaq istəmirəm, buna görə də belə qərar verdim”, – Yermak deyib.
Qəzetin məlumatına görə, o, cəbhəyə nə zaman və hansı formada gedəcəyini açıqlamayıb.
Xatırladaq ki, 10 noyabrda Ukraynanın antikorrupsiya qurumları energetika sahəsində genişmiqyaslı korrupsiya sxeminin ifşa olunması məqsədilə “Midas” adlı əməliyyata start verib. Araşdırma ölkədə siyasi böhrana səbəb olub – parlamentin fəaliyyəti iflic vəziyyətinə düşüb, hakim “Xalqın qulluqçusu” partiyasından bir sıra deputatlar Yermakın istefasını tələb ediblər.
28 noyabrda antikorrupsiya əməkdaşlarının Yermakın mənzilində və ofisində axtarış apardığı bildirilmiş, Yermak da bunu təsdiqləmişdi. Daha sonra Prezident Zelenski onun istefa ərizəsi yazdığını açıqlayıb.
