İranın Vətəndaş Qeydiyyatı Təşkilatı türk adlarına qoyulan qadağaya qarşı artan ictimai təzyiqi azaltmaq üçün ad seçimi sistemində yeni məhdudiyyət tətbiq edib. Tribunainfo.az xəbər verir ki, bu barədə “Azad İran” səhifəsi məlumat yayıb.
Məlumatda deyilir ki, bir neçə gün öncəyə qədər vətəndaşlar “Sahim” adlı Ad Seçmə Sisteminə daxil olaraq istədikləri adın icazəli olub-olmadığını pulsuz şəkildə yoxlaya bilirdilər. Ancaq “Balamın Adı” kampaniyasının araşdırması göstərib ki, artıq sistemə giriş çətinləşdirilib və ödənişli olub.
Belə ki, “Sahim”ə keçid etmək istəyən istifadəçilər avtomatik şəkildə İranın Rəqəmsal Şəxsiyyət Sisteminə yönləndirilir. Burada onlardan üztanıma vasitəsilə şəxsiyyəti təsdiq etmələri tələb olunur və xidmətə davam edə bilmələri üçün 19.800 tümən ödəniş tətbiq edilib.
Qeyd edək ki, əvvəllər ictimaiyyət “Sahim”də sərbəst axtarış edərək bəzi türk adlarının səbəbsiz qadağan olunduğunu müəyyən edə bilirdi.
Fərda Uğur
