Bakı Şəhəri Mənzil Kommunal Təsərrüfat Departamentinin balansında olan iki Mənzil Kommunal Təsərrüfat Birliyi tender elan edib və dünən onların nəticələri açıqlanıb. Tribunainfo.az xəbər verir ki, həmin tenderlərdən birini Nəsimi rayon Mənzil Kommunal Təsərrüfat biriliyi reallaşdırıb.
Təsərrüfat prosesinin arasıkəsilməzliyini təmin etmək məqsədilə müxtəlif növ malların satın alınması üzrə keçirilən müsabiqə üçün 15.257,4 manat pul ayrılıb.
Digər tender isə Binəqədi MKTB həyata keçirəcək. Xidməti istifadə üçün nəzərdə tutulan təsərrüfat maşınlarının cari təmiri işləri zamanı istifadə olunacaq müxtəlif növ hissələrin satın alınması ilə bağlı müsabiqənin dəyəri isə 53.218 manat təşkil edəcək.
Qeyd edək ki, hər iki tenderin qalibi “BİLGƏ QRUP” QSC-dir. Bu şirkət uzun zamandır tender oyunlarının içindədir. Əsasən İcra Hakimiyyətlərinin keçirdiyi tenderlərə qatılaraq, qalib gəlir. Məsələn, təkcə, keçən ilin son aylarında bu şirkət 10 tenderin qalibi olub. Bu il isə belə tenderlərin sayının 30-u keçdiyi qeyd edilir.
“BİLGƏ QRUP” Qapalı Səhmdar Cəmiyyətinin Bakı şəhəri Lokal Gəlirlər Baş İdarəsində 01.10.2018-ci il tarixdə dövlət qeydiyyatına alınıb. Nizamnamə kapitalı 2000.00 manat olan QSC-nin hüquqi ünvanının BAKI ŞƏHƏRİ YASAMAL RAYONU, YENİ YASAMAL 2, ev 6, m. 190-dur. Qanuni təmsilçisinin isə İsmayılov Elvin Sahib oğlu olduğu göstərilir. Lakin reyestrinə daxil edilmiş məlumatlarda 05-25-2021-ci il tarixədək QSC-nin qanuni təmsilçisi Nigar Şahhüseynbəyova Faiq qızı olduğu göstərilir.
Bu şəxslər haqqında açıq mənbələrdə məlumat yoxdur.
Tribunainfo.az bu şirkətlə bağlı maraqlı bir araşdırma aparıb. Məlum olub ki, “Bilgə Group” heç də abadlıq, təmir işlərində fəal olan şirkət deyil. Onları daha çox restoran, əyləncə sektoru maraqlandırır. Elə bu səbəbdən də həmin sahələrə ciddi investisiyalar qoyurlar. Bunu keçən il şirkətin açdığı restoran və əyləncə mərkəzlərindən də aydın görmək mümkündür. Məsələn, ötən il “Bilgə Property”nin tərəfdaşlığı ilə “Legend” bilyard klubu, “Rotante” restoranı, Memorial hospitalının Nərimanov filialı, “Tabakevi” mağazası, “T-Döner” kafesi, NPT Panel, PKS Doors, FrioPlus mağazaları, “GreenBox” kafesini açıb.
