Yasamal Rayon İcra Hakimiyyətinin rəsmi məlumatına görə, iyul ayı ərzində keçirilən vətəndaş qəbullarında 750-dən çox sakin dinlənilib. Lakin bu rəqəmlər sosial şəbəkələrdə etirazla qarşılanıb.
Tribunainfo.az xəbər verir ki, rayon sakini, jurnalist Fimar Asımqızı paylaşımında bildirib ki, sadəcə insanları dinləməklə məsələ həll olunmur, əsas olan konkret nəticələrdir:
“Ağ oldu lap. Başlığın barıtını kim çox edibsə, qonorarından kəsin. O rəqəmi azaltsın. Dinləyib ey, ayıbdı, ayıb. Bari 75 yazaydınız. Bəs neçə nəfərin problemini həll edib? Konkret kimin? Şəxsən mən qəbulda olmuşam, yazılı müraciətlər etmişəm, hamısı da boş. Hər şikayətimdən sonra küçəmiz qarış-qarış satılıb”.
Fimar xanım iddia edir ki, onun dəfələrlə etdiyi yazılı və şifahi müraciətlərə baxılmayıb, əksinə, müraciət etdikcə yaşadığı küçədə qanunsuz satış və dəyişikliklər daha da artıb.
Hazırda Yasamal sakinləri İcra Hakimiyyətindən konkret həll yolları və real nəticələr gözlədiklərini bildirirlər. Sakinlər statistik göstəricilərlə ictimaiyyəti aldatmaq əvəzinə, problemlərin həll edilməsini tələb edirlər.
Qarşı tərəfi dinləməyə hazırıq.
Gülşən Rəsul
