ADMİU nəzdində Humanitar Kollec və Binəqədi Rayon İcra Hakimiyyətinin birgə təşkilatçılığı ilə 2 Fevral – Azərbaycan Gəncləri Gününə həsr olunmuş konsert proqramı keçirilib.
Tədbirdə Rayon İcra Hakimiyyəti başçısının müavini Sevinc Süleymanova, Azərbaycan Respublikası Milli Məclisinin deputatı Səbinə Xasayeva, Rayon İcra Hakimiyyəti başçısı Aparatının İctmai-siyasi və humanitar məsələlər şöbəsinin müdiri Nicat Allahverdiyev və şöbənin əməkdaşı, Yeni Azərbaycan Partiyası Binəqədi Rayon Təşkilatının sədrinin müavini Sevinc Abdullayeva, Azərbaycan Dövlət Mədəniyyət və İncəsənət Universitetinin nəzdində Humanitar Kollecin direktoru Nərmin Qaralova, pedoqoji kollektiv və tələbələr iştirak edib.
Qonaqlar əvvəlcə Humanitar Kollecin xalçaçı və rəssam tələbələrinin əl işlərindən ibarət sərgi ilə tanış olub.
Kollecin Akt Zalında baş tutan bayram tədbiri Dövlət Himni səsləndirilməsi ilə açıq elan olunub, bu günün təsisçisi Ulu Öndər Heydər Əliyevin və torpaqlarımızın azadlığı uğrunda canlarını fəda edən şəhidlərimizin əziz xatirəsi ehtiramla yad edilib.
Tədbiri giriş sözü ilə açan ADMİU nəzdində Humanitar Kollecin direktoru dosent Nərmin Qaralova əlamətdar gün münasibətilə müstəqil Azərbaycan gənclərini təbrik edib, onlara xoşbəxt gənclik, sağlamlıq və uğurlu gələcək arzulayıb. Direktor Gənclər Günü barədə Ulu Öndər Heydər Əliyevin tarixi Sərəncamının əhəmiyyəti və bu sahədə ölkə Prezidenti İlham Əliyevin rəhbərliyi ilə görülən işlər barədə geniş məlumat verərək vurğulayıb ki, bu gün hər sahədə gənclərə göstərilən qayğı, diqqət göz önündədir:
“Biz bunu təhsil müəssisəsi olaraq hər zaman hiss edirik. Ümid edirəm, gənclər onlara yaradılan bu şəraitdən səmərəli istifadə edirlər. Bilirsiniz ki, gənclik insan həyatının ən xüsusi, fərqli bir dövrüdür. Bu dövrdə insan öyrənir, daim inkişaf edir, dünyanı dərk etməyə, özünü tapmağa, mənəvi dəyərlərini, gələcəyini formalaşdırmağa çalışır. Ona görə bu günlərin dəyərini bilmək lazımdır. Qürur hissi ilə qeyd etməliyəm ki, bu gün Humanitar Kollecin tələbələri müxtəlif tədbirlərdə fəal iştirak etməklə mühüm proseslərdə rol oynayır, ölkəmzi xaricdə də layiqincə təmsil etməyə çalışırlar.”
Sonra Binəqədi Rayon İcra Hakimiyyəti başçısının müavini Sevinc Süleymanova çıxışında deyib:
“Ulu öndər Heydər Əliyevin gəncliyə göstərdiyi qayğının bir təzahürüdür ki, fevral ayının 2-i respublikamızda Azərbaycan Gəncləri günü elan olunub və 1997-ci ildən hər il gənclərimiz bu günü qeyd edir. Sevinc xanım Gənclər gününün MDB məkanında və Şərqi Avropa ölkələri arasında ilk dəfə Azərbaycanda qeyd olunmağa başlandığını, dünyada isə yalnız 1999-cu ildə BMT-nın qərarı ilə avqustun 12-si Ümumdünya Gənclər günü elan edildiyini sözlərinə əlavə edib.”
Tədbirdə çıxış edən millət vəkili Səbinə Xasayeva və Yeni Azərbaycan Partiyası Binəqədi Rayon Təşkilatının sədrinin müavini Sevinc Abdullayeva ölkədə və Binəqədi rayonunda gənclərlə bağlı görülən işlərdən danışıb, gəncləri bayram münasibəti ilə təbrik edib, onlara uğurlar arzulayıblar. Natiqlər gənclərin Azərbaycanın gələcəyi kimi dəyərləndirildiklərini, azərbaycançılıq məfkurəsi ruhunda tərbiyə almış bu nəsilin dövlətimizin ictimai-siyasi, iqtisadi və mədəni inkişafında mühüm rol oynayaraq ildən-ilə potensialının gerçəkləşdirilməsi üçün daha geniş imkanlar əldə etdiklərini xüsusi vurğulayıblar. Bildiriblər ki, Azərbaycanda həyata keçirilən gənclər siyasəti həm də onları vətənpərvər ruhda formalaşdırıb. 44 günlük Vətən müharibəsində düşmən tapdağında olan torpaqlarımızın azad olunması uğrundakı döyüşlərdə əldə olunan tarixi qələbəmiz bir daha sübut etdi ki, mübariz Azərbaycan gəncliyi vətənimizi qorumağa və bu yolda can verməyə daim hazırdır.
Konsert proqramının bədii hissəsində ADMİU nəzdində Humanitar Kollecin musiqiçilərdən ibarət müəllim və tələbə heyətinin ifasında “Məhəbbət”, “Alma atdım nar gəldi”, “You are the reason”, “Flamenko”, “Doğma diyar”, Göygöl”, “Həyat sevgisi”, “Bulaq suyu, dağ havası”, “Ritm kompozisiyası”, “Şirvan müxəmməsi – Bəhri divani” və “Həyat sevgisi” kimi yerli və xarici bəstəkarların əsərləri səslənib.
