Hamiləlik gələcək ananın qidalanmasına xüsusi diqqət yetirməli olduğu dövrdür. Bəzi qidalar hamiləlik dövründə körpənin sağlamlığına mənfi təsir göstərərək fəsadlara səbəb ola bilər.
Hamiləlik zamanı qəbul edilməsi tövsiyə olunmayan qidaları təqdim edirik:
Çiy və ya az bişmiş ət və balıq
Çiy və ya az bişmiş ətlərdə bir sıra zərərli bakteriyalar ola bilər. Bu bakteriyalar qida zəhərlənməsinə və infeksiyalara səbəb olduğu üçün əti tam bişmiş formada istehlak etmək lazımdır. Suşi kimi çiy balıq olan qidalarda zərərli mikroorqanizmlər ola bilər. Bu mikroorqanizmlər dölün inkişafdan qalmısana, vaxtından əvvəl doğuşa və anadangəlmə anomaliyalara səbəb ola bilər. Balıq da yaxşı bişmiş halda istehlak edilməlidir.
Pasterizə olunmamış süd və süd məhsulları
Pasterizə edilməmiş süd və pendir listeria infeksiyası riski daşıyır. Bu infeksiya dölün inkişafdan qalmasına, vaxtından əvvəl doğuşa vəvanadangəlmə anomaliyalara səbəb ola bilər. Pasterizə edilmiş süd və pendirə üstünlük verilməlidir.
Çiy və ya az bişmiş yumurta
Çiy və ya az bişmiş yumurta salmonella riski daşıyır. Salmonella infeksiyası mədə problemlərinə və hamiləlik fəsadlarına səbəb ola bilər. Yumurtalar tam bişmiş halda istehlak edilməlidir.
İşlənmiş ət və hazır qidalar
Kolbasa və sosiska kimi emal edilmiş ətlərdə zərərli mikroorqanizmlər ola bilər. Ona görə də bu kimi qidaları istehlak etmək tövsiyə olunmur. Bu qidalar həddindən artıq çəki artımına və hamiləlik diabetinə səbəb ola bilər. Sağlam qəlyanaltılara və təzə qidalara üstünlük verilməlidir.
Kofein
Həddindən artıq kofein istehlakı dölün inkişafdan qalmasına və vaxtından əvvəl doğuş riskinin artmasına səbəb ola bilər. Gündəlik kofein qəbulu 200 mq ilə məhdudlaşdırılmalıdır. Bu miqdar təxminən 1-2 fincan qəhvəyə uyğundur. Qəhvə, çay, coca-cola və enerji içkiləri kimi tərkibində kofein olan içkilərin istehlakı məhdudlaşdırılmalıdır.
Spirtli içkilər
Hamiləlik dövründə spirt istehlakından tamamilə uzaq durmaq lazımdır. Alkoqol anadangəlmə anomaliyalara səbəb ola bilər.
Şəkərli və duzlu olan qidalar
Həddindən artıq şəkər istehlakı hamiləlik diabeti riskini artıra, köklüyə səbəb ola bilər. Şəkərli içkilərdən və şirniyyatlardan uzaq durmaq lazımdır. Həddindən artıq duz istehlakı isə yüksək təzyiq və ödəm riskini artıra bilər.
pravda.az
