Göyçayda “Fırçanın sirdaşı və ya bir rəssam ömrü” adlı rəsm sərgisi keçirilib.
Tribunainfo.az xəbər verir ki, sərgi Göyçay rayonunda yerləşən 3 saylı şəhər kitabxanasında qeyd olunub. Rəssam pedaqoq Ehtiram Kərimovun 70 illik yubileyinə həsr olunmuş sərgidə onun 52 rəsm əsəri nümayiş olunub. Ziyalıların, kitabxana əməkdaşlarının və sənətsevər şəxslərlə yanaşı, rayon ictimaiyyət nümayəndələrinin iştirakçı olduğu sərgi xüsusi maraqla qarşılanıb. 70 illik ömrünün 40 ilini pedaqoqluğa həsr edən Ehtiram Kərimov rayonun iki orta təhsil və bir orta ixtissas təhsil müəssəsində müəllim kimi çalışıb. İndiyə qədər 700-dən artıq əl işi olan rəssam ümumilikdə 15 sərgi keçirdiyini bildirir. Onun yalnız rayonda deyil, paytaxtda və Türkiyədə də sərgiləri keçirilib. Rəssam deyir ki, belə sərgilərin davamlılığı rayon səviyyəsində mədəniyyətin, incəsənətin inkişafına, tanınmasına, sevilməsinə dəstək verir. Ancaq sənətkar qeyd edir ki, sənətin inkişaf naminə daha böyük dəstəyə ehtiyacı var.
“Bu mənim yubiley sərgimdir.52 rəsm əsərim var. Rəsmlərdə mən portert, mənzərə, natürmot , abstrakt və digər janrlarda işləmişəm. Bu sərgi üçün bir ayda 12 portret janrında rəsm çəkmişəm ki, çatsın. Yaşlı insanların, sənətkarların, tələbələrimin və hətta öz portretimi də çəkmişəm. 3-4 ay öncə mərhum sənətkar, tarzən Rövşən Zamanovun portretini yağlı boya ilə çəkdim. Bu işə bir ay vaxt sərf etdim.Portreti ailəsinə hədiyyə edəcəm. Belə sərgilərin tək məqsədi ancaq bölgələrdə rəssamlığa maraq yaratmaq, inkişaf etdirmək və incə zövq formalaşdırmaqdır.Bu günə qədər istedadlı 200-ə yaxın tələbə yetişdirmişəm ki, onlar Rəssamlıq Akademiyasında, digər ali təhsil ocaqlarında, eləcə də orta ixtissas təhsil müəssələrində oxuyurlar. Bitirən də var, oxuyan da var. İstəyirəm ki rayonda bu sənət xüsusilə inkişaf eləsin, maraq yaransın, sərgilərin sayı çox olsun. Akvarel , yağlı boya sərgiləri keçirilsin. Mənə sadəcə dəstək olan yoxdur. Dəstək əsasən bu “Arvan”adlanan kitabxananın rəhbər və əməkdaşlarıdır. Mehriban xanım, Mətanət xanım və Yeganə xanım onlar hər zaman bu kiçik, amma doğma kitabxanada sərgilərimi keçirməyə şərait yaradır”
Rəsmi açılışla elan olunan sərgidə çıxış edənlər rəssamın şərəfli ömür yoluna və yaradıcılığına nəzər salıblar. Çıxışlardan sonra sərgilənən əsərlərə baxış keçirilib. Ayın 4-nə qədər davam edəcək sərgini rayon ictimaiyyəti və sənətsevərlər gəlib izləyə bilər. Rəssam bildirir ki, onun tək arzusu rayonda rəsm qaleriyasının olmasıdır. 30 ildir ki, kiçik emalatxanasında çalışaraq dərs keçən rəssam pedaqoq nə sənətindən, nə fırçasından yorulub. Qaleriya kimi tək arzusu isə çəkilən rəsmlərin qorunması, davamlı sərgilənməsi və rəssam həmkarların bir yerdə çalışması amaclıdır. Rəssam daha çox istedadlı tələbələr yetirmək, daha çox rəsm çəkmək və sənətin sehrində qalmaq istəyir.
“ Bu sərgilər əlim fırça tutduqca davamlı olacaq. İnsanları, gəncləri incəsənətə yönəltmək üçün , rənglərin sehrini, sənətin dərinliyini dərk etdirmək üçün çalışmalıyam. Bir rəssam kimi istəyirəm ki, rayonda rəsm qaleriyası olsun. Neçə ildir ki, çalışıram, belə sərgilər təşkil edirəm ki, bizə bir yer, məkan ayırsınlar, qaleriya kimi yararlanıb rəsm sərgilərini tez-tez təşkil edək. Zamanla bura üz tutanlar o qaleriya vasitəsilə bizim kimi fədakar rəssamların, gənclərin istedadından , sənətindən, yaradıcılığından xəbərdar olsun. Hər ay rəsm qaleriyasında tələbələrimin sərgilərini təşkil etmək əla olar. Çox uğurlu tələbələrim var ki, bu gün onlar rəssam kimi, həm də pedaqoq kimi çalışırlar, qeyri -adi rəsmlər çəkirlər. Xaricdə oxuyan tələbələrim var. Bakıda bu işi uğurla davam etdirən daha çox tələbələrim var. Öz qızım da ali təhsilli rəssamdır. Türkiyədə çalışır. Akvarel cəmiyyətinin rəhbəri kimi çalışan tələbələrim var. Autizm uşaqlarla çalışırlar və böyük sərgi edəcəklər.Bu sərgiyə on ölkədən rəssam qonaqlar gələcək. Bu üzdən tələbələrimin uğurları ilə qürur duyuram, özüm də yaratmaqda israrlıyam. Allahdan mənə ruh gəlir. Bir ay dayanmadan çalışıram. 50-60 yaşdan sonra biz rəssamlar daha çox çəkmək, daha çox sənətlə yaşamaq istəyirik”
Qeyd edək ki, sərgi ayın 4-ə qədər davam edəcək.
Günel İsayeva
