Ermənistanın 2024-cü ilin ilk 7 ayında (yanvar-iyul) ticarət dövriyyəsi 20,4 mlrd. dollar təşkil edib. Tribunainfo.az-ın verdiyi məlumata görə, iqtisadçı Natiq Cəfərli bunun səbəblərini izah edib və Rusiyanın sanksiyalardan yayınmasında köməklə əlaqələndirib. Onun sözlərinə görə, Ermənistanın 2024-cü ilin ilk 7 ayında ticarət dövriyyəsi, 2023-cü ilin eyni dövrünə görə 2 dəfə artıb – bu təbii artım ola bilməz: “Rusiya ilə ticarət dövriyyəsi 9 mlrd. 75 mln. dollar olub, və keçən ilin eyni dövrünə görə 2,4 dəfə (!!!) artıb – dava edən, küsən, ölkələrin ticarəti bu qədər arta bilməz. Sadəcə Qərb “kor olub” Ermənistanın Rusiyaya sanksiyalardan yan keçməyə necə gözəl kömək etdiyi görmür, üzdə yalançı dava da Qərbi “kor” etmək üçündür”.
İqtisadçı əlavə edib ki, Birləşmiş Ərəb Əmirliyi guya bizimlə dostdur, amma bu ilin ilk 7 ayında Ermənistanla ticarət dövriyyəsi 4 mlrd. dollar olub, bu 2023-cü ilin eyni dövrü ilə müqaisədə 7,3 dəfə (!!!) artım deməkdir: ” Sxem çox sadədir – BƏƏ-də şirkətlər Rusiyaya silah istehsalında, dronda, raketdə lazım olan yarımkeçirici və mikrosxemləri ABŞ, Çin, Tayvan, AB ölkələrindən alır və formal olaraq Ermənistana satır. İrəvan da Kremlə hava-su kimi lazım olan o malları BƏƏ-dən alıb, Rusiyaya satır-ötürür. Qərb də qazanır, BƏƏ də, Ermənistan da, Rusiya da – uduzan Ukraynadır, bu ölkənin şəhər-kəndləri xaraba qalır, insanları ölür.
Artıq 4 ildir, əsas da son 2 ildə dəfələrlə yazmışam-danışmışam, sübut etmişəm ki, Rusiya-Ermənistan “davası” teatrdır, kinodur, şoudur, Qərbin bir çox ölkələri isə ya doğrudan da kordur, qanmır, ya da özünü korluğa, qanmazlığa qoyublar.
Ermənistanın KTMT məsələsində duruşunu Qərb alqışlayır, amma KTMT var ki?! Ukrayna Kurskda 1300 km2 Rusiya ərazisini işğal edib (düz edib), KTMT qaydalarına görə indi bütün üzv ölkələr Rusiyaya kömək üçün qoşun göndərməli idilər – amma veclərinə də deyil, çünki KTMT “ölü” orqandır. Ermənistanın “ölü” orqanda iştirak edib-etməməsi Rusiyanın vecinə də deyil, zatən Ermənistanda hərbi bazaları var, iqtisadiyyatın 70%-nə birbaşa nəzarət edir, Paşinyan və komandası da Kremlin əmrindədir. Amma Qərb KTMT məsələsini bayraq edib deyir ki, Ermənistan Qərbyönümlüdür, bizdə də bəzi təkhüceyrəlilər söyləyirlər ki, Putin Paşinyanı devirmək üçün Azərbaycana dəstək verir, daha anlamırlar ki, Moskva doğrudan da Paşinyanı devirmək istəsəydi, son 6 ildə 60 dəfə devirərdi. Niyə devirsin ki?! Gözəl şou qurublar”.
Əjdər
