ABŞ rəsmisi iddia edib ki, Çinin ən müasir nüvə sualtı qayığı bu ilin əvvəlində naməlum nasazlıq səbəbindən batıb.
Tribunainfo.az “Sözcü” nəşrinə istinadən xəbər verir ki, rəsmi Çinin bu hadisəni “rüsvayçılıq mənbəyi” kimi gördüyünü və ictimaiyyətdən gizlətdiyini bildirib.
Çin hazırda 370-dən çox gəmi ilə dünyanın ən böyük donanmasına sahibdir. Hərbi imkanlarını təkmilləşdirməyə davam edən Pekin administrasiyası hazırda yeni nəsil nüvə sualtı qayıqlarını öz donanmasına daxil etmək üçün hazırlıq görür.
ABŞ-ın yüksək rütbəli müdafiə rəsmisi bildirib ki, Çinin yeni nəsil birinci dərəcəli nüvə enerjili hücum sualtı qayığı may və iyun ayları arasında hərbi estakadanın yaxınlığında batıb. Rəsmi Çin müdafiə sənayesini tənqid edib.
İyun ayında Planet Labs şirkəti batdığı iddia edilən nüvə sualtı qayığının yerləşdiyi Wuchang limanından peyk şəkillərini paylaşdı. Görüntülərdə sualtı qayıq böyüklüyündə su altında qalmış obyektin ətrafına toplaşan kranlı xilasetmə gəmiləri diqqət çəkib.
