Ruben Vardanyanın oğlu David Vardanyan atası və digər erməni əsirlərlə bağlı beynəlxalq ictimaiyyətə müraciət edərək, onları “qanunsuz həbs olunmuş” kimi təqdim edir.
Musavat.com xəbər verir ki, Fransanın “Le Journal du Dimanche” qəzetində yayımlanan məqaləsində Vardanyan Azərbaycanı tənqid edərək, atasının “erməni olduğu üçün həbs edildiyini” iddia edir. Lakin bu cür açıqlamalar reallıqdan uzaq, siyasi manipulyasiya xarakteri daşıyır və həqiqəti təhrif edir.
Bəli, David Vardanyanın sözləri açıq-aşkar təhriflərə əsaslanır. Məsələn, o iddia edir:
“Mənim atam Ruben Vardanyan və 22 digər erməni yalnız erməni olduqları üçün həbs olunublar. Necə olur ki, ədalət, insan hüquqları və qlobal əməkdaşlıqdan danışılır, halbuki həmin insanlar cəmi bir neçə yüz metr uzaqlıqda işgəncələrə məruz qalırlar?”
Bu cür ifadələr, beynəlxalq ictimaiyyətin diqqətini yanlış istiqamətə yönəltməyə hesablanıb. Ruben Vardanyan, Azərbaycanın qanuni ərazisi olan Qarabağda separatçı fəaliyyətlərdə iştirak etdiyi, konkret cinayət əməli törətdiyi üçün Azərbaycan məhkəməsi tərəfindən məsuliyyətə cəlb edilib, haqqinda istintaq hərəkəti aparılır. Onun hərəkətləri təkcə Azərbaycanın suverenliyini pozmaqla kifayətlənməyib, həm də regionda sabitliyi pozmağa yönəlib, müharibəyə, insan tələfatlarına səbəb olub.
David Vardanyan atasını “humanitar fəaliyyətlə məşğul olan şəxs” kimi təqdim edərək, onun Qarabağda icra etdiyi fəaliyyətləri sülhsevər layihələr kimi qələmə verir. Lakin Ruben Vardanyanın rəhbərliyi ilə həyata keçirilən layihələrin əksəriyyəti separatçılığa dəstək xarakteri daşıyırdı. O, Qarabağdakı erməni icmasını Azərbaycana qarşı yönəltmək və beynəlxalq arenada Azərbaycana təzyiq göstərmək məqsədilə çalışıb.
David Vardanyan atasının “Avrora” humanitar təşəbbüsü və digər layihələrini önə çəkərək deyir:
“Mənim atam həyatını başqalarına kömək etməyə həsr edib. Bu gün isə köməyə ehtiyacı olan odur.”
Lakin burada Vardanyanın fəaliyyətlərinin humanitar aspektlərini təbliğ etməklə onun siyasi məqsədlərini gizlətmək cəhdi açıq-aşkar görünür. Üstəlik, Ruben Vardanyan Azərbaycan sərvətlərini qanunsuz istismar etməklə, özbaşına sahibkarlıq fəaliyyəti qurmuş, qanunları pozmuş, üstəlik, ölkəmizin ərazilərini, filiz yataqlarlnı, çay və meşələrini eko-terrora məruz qoymuşdur.
Azərbaycanın qanuni ərazisində separatçılığa və terror fəaliyyətinə heç bir halda dözümlülük göstərilməyəcəyi beynəlxalq hüquqa əsaslanır. Ruben Vardanyanın həbsi və məhkəmə prosesləri Azərbaycanın daxili işləridir və beynəlxalq hüquq normalarına uyğundur.
COP29 konfransının Bakıda keçirilməsi Azərbaycanın qlobal əhəmiyyətli məsələlərdə mühüm rolunu göstərir. Bu cür təxribatçı açıqlamalar isə yalnız Azərbaycanın müsbət imicinə xələl gətirmək cəhdidir.
David Vardanyanın bu cür açıqlamaları Ermənistanın Azərbaycana qarşı apardığı informasiya müharibəsinin bir hissəsidir. O, atasının qanunsuz əməllərini ört-basdır etmək və beynəlxalq ictimaiyyəti yanlış məlumatlandırmaq üçün emosional manipulyasiya metodlarından istifadə edir. Azərbaycan beynəlxalq hüquqa əsaslanan mövqeyini davam etdirir və separatçılıqla mübarizədə qətiyyətlidir.
