Dağıstanın Serqoqala rayonunun rəhbəri Maqomed Omarovun iki oğlu və bir qardaşı oğlu hüquq mühafizə orqanları tərəfindən tanındıqdan sonra, təhlükəsizlik qüvvələri onu saxlayıblar.
Bu barədə “Komsomolskaya pravda” yazıb.
23 iyun tarixində Dərbənd və Mahaçqalada silahlı şəxslər iki pravoslav kilsəsinə, sinaqoqa və DYP postuna hücum ediblər.
Rusiya İstintaq Komitəsinin məlumatına görə, hücum nəticəsində 19 nəfər həyatını itirib. Onların arasında 15 hüquq-mühafizə orqanının əməkdaşı və dörd mülki şəxs, o cümlədən bir pravoslav keşişi var. Respublika ərazisində matəm elan edilib.
Terror hücumları ilə bağlı cinayət işi açılıb. Təhlükəsizlik qüvvələri tərəfindən zərərsizləşdirilən beş nəfərin hamısı tanınıb. KİV-in məlumatına görə, onların arasında Serqoqala rayonunun başçısının iki oğlu və bir qardaşı oğlu da var.
“Vahid Rusiya” partiyasının regional siyasi şurası Serqoqala rayonunun başçısı Maqomed Omarovu partiyadan xaric edib.
Qəzetin məlumatına görə, məmurun oğullarından biri Osman Mahaçqalada Ermoşkin küçəsində sinaqoqu yandırıb.
64 yaşlı Maqomed Omarovun ümumilikdə səkkiz oğlu var. O, artıq 14 ildir ki, Serqoqala rayonunun başçısıdır. Əvvəllər bank strukturlarında işləyib və Dağıstan Respublikasının Əməkdar İqtisadçısı fəxri adını alıb. Həmçinin Dağıstan Xalq Məclisinin deputatı olub.
“Baza” Telegram kanalının məlumatına görə, Serqoqala rayonunun başçısı dindirilmə zamanı bir neçə oğlunun və qardaşı oğlunun radikal islam cərəyanının tərəfdarı olduqlarını bildiyini etiraf edib.
Bununla belə, o, hüquq-mühafizə orqanlarını əmin edib ki, qalan qardaşlar və qohumlar onları dəstəkləməyib. Maqomed Omarovun sözlərinə görə, oğulları və qardaşı oğlu ilə baxışları səbəbindən ailədə tez-tez mübahisələr yaranıb.
Qeyd edək ki, hazırda Maqomed Omarov haqqında cinayət işinin açılması məsələsi müzakirə olunur. Onu terrorçulara kömək etməkdə şübhəli bilirlər. Onun ailə üzvlərinin hamısı yaxın zamanda kütləvi dindirmələrə məruz qalacaq.
Bildirilir ki, Omarovun hər iki oğlu – Osman və Adil terror şəbəkəsinin üzvləri olub.
