Çin, İran və Rusiya hərbi dəniz qüvvələri çərşənbə günündən başlayaraq birgə dəniz təlimi keçirir.
Tribunainfo.az Mehrnews-a istinadən xəbər verir ki, Çin və Rusiya hərbi gəmiləri Hind okeanının şimalında “Təhlükəsizlik kəməri-2023” təlimini keçirmək üçün İranın ərazi sularına daxil olub.
Pekin bildirib ki, üçtərəfli dəniz təlimləri çərşənbə günündən etibarən Oman körfəzində beş gün ərzində keçiriləcək.
Çin Müdafiə Nazirliyindən verilən məlumata görə, təlim bazar günü başa çatacaq.
Pekin, Moskva və Tehran hərbçiləri indiyədək bir neçə birgə təlim keçirib.
“Təhlükəsizlik Kəməri-2023” təlimi üç ölkənin 2019 və 2022-ci illərdə keçirdiyi iki birgə dəniz təlimindən hazırlanıb”, – nazirlik bildirib.
O əlavə edib ki, Çin ordusu havadan axtarış, dənizdə xilasetmə və gəmi paradını əhatə edən təlimlərdə iştirak etmək üçün idarə olunan raket esminesi “Nanninq”i göndərəcək.
“Təhlükəsizlik Kəməri-2023” təlimi iştirakçı ölkələrin donanmaları arasında praktiki əməkdaşlığın dərinləşməsinə kömək edəcək, onların dəniz təhlükəsizliyini birgə qorumaq, ortaq gələcəyi olan dəniz icmasını fəal şəkildə qurmaq istəyi və bacarığını daha da nümayiş etdirəcək və müsbət impuls verəcək”, – Çin Müdafiə Nazirliyi bildirib.
