İspaniyada yaşayan bir cütlük — “Flexcidine” ləqəbli qalisiyalı kontent yaradıcısı və onun sevgilisi — Puerto Rikoya uçuşlarını süni intellektin verdiyi səhv cavab səbəbindən itiriblər. Hadisə o zaman viral olub ki, onlar sosial şəbəkədə çəkdikləri videoda əsəblərini gizlətməyərək, birbaşa süni intellekti günahlandırıblar: “Artıq o…-a əsla inanmıram”, – deyə Flexcidine bildirib.
Tribunainfo.az.larazon.es-ə istinadən bildirir ki, video artıq minlərlə baxış toplayıb.
Cütlük Karib adasına səyahət etməzdən əvvəl ChatGPT-yə viza lazım olub-olmadığını soruşub. Süni intellekt onlara viza tələb olunmadığını bildirib. Cavab inandırıcı göründüyündən, onlar rəsmi mənbələrdən yoxlamağa ehtiyac duymayıblar.
Lakin hava limanında təhlükəsizlik yoxlamasından keçərkən, Puerto Rikoya daxil olmaq üçün ispan vətəndaşlarından tələb olunan sənədlərə sahib olmadıqları üzə çıxıb. Nəticədə onlara reysə minmək icazəsi verilməyib və planlaşdırdıqları tətil tamamilə alt-üst olub.
Şərhlər isə gecikməyib: “Səyahət üçün süni intellektdən istifadə etmək qətiyyən tövsiyə olunmur. Orada olmuş insanların real təcrübələrini oxumaqdan yaxşısı yoxdur”, – deyə bir sosial şəbəkə istifadəçisi yazıb. Digər biri isə belə bildirib: “Hələ də başa düşmürəm ki, niyə insanlar köhnə, sınanmış Google əvəzinə ChatGPT istifadə edirlər”.
Tənqidlər yalnız alətə deyil, həm də inflyuenserin özünə yönəlib. İzləyicilər onun məlumatı yoxlamadığını və beynəlxalq səyahət planlaşdırmaq üçün ən azı rəsmi mənbələrə müraciət etmədiyini vurğulayıblar.
İlkin uğursuzluğa baxmayaraq, cütlük sonda lazım olan icazəni əldə edib və səyahətlərini yenidən planlaşdırıb. Bir neçə gün sonra isə Puerto Rikoya uçaraq planlarına davam edə biliblər.
İmran Kərimli
View this post on Instagram
