Çay olduqca faydalı müalicəvi içkidir – ürək-damar xəstəliklərindən, xərçəngdən qoruyur, beyinin fəaliyyətinə müsbət təsir göstərir, insanı daha gümrah edir, əmək qabiliyyətini artırır. Lakin bu faydalardan yararlanmaq üçün çayı düzgün dəmləmək və vaxtında içmək lazımdır.
Tribunainfo.az xəbər verir ki, çayı şüşə, saxsı və ya çini çaydanda dəmləmək lazımdır. Dəmir çaydanlardan istifadə etmək məsləhət görülmür.
Çayı dəmləyərkən bir neçə dəfə qaynadılmış sudan istifadə etmək tövsiyə edilmir.
Boş dəm çaydanını 3-4 dəfə qaynar su ilə yaxalayın. Sonra dəm çaydanına hər stəkan üçün bir çay qaşığı quru çay töküb yarıya qədər su tökün, çaydanın ağzını qapaqla bağlayıb üstünü dəsmalla örtün. Çay dəmləyərkən dəm çaydanını qazın üzərinə qoymaq olmaz.
Çay 5-7 dəqiqə ərzində dəmləndikdən sonra, çaydana axıra qədər qaynar su tökün. Əgər çayın üzərində köpüklər əmələ gəlibsə, deməli, çay düzgün dəmlənilib.
Çayı yalnız təzə halda, dəmləndikdən sonra 1 saat ərzində içmək olar. Daha sonra çayın faydalı xüsusiyyətləri kəskin şəkildə azalmağa başlayır.
