Cənubi Koreya aşağı doğum səviyyəsi ilə mübarizə üçün nazirlik yaratmağı planlaşdırır.
Tribunainfo.az NDTV kanalına istinadən xəbər verir ki, bunu ölkə prezidenti Yun Seok Yeol deyib.
“Mən parlamentdən aşağı doğum nisbətləri ilə mübarizə aparacaq nazirliyin yaradılması üçün hökumətin təşkilinin nəzərdən keçirilməsində əməkdaşlıq etməyi xahiş edirəm”, deyə prezident xalqa müraciətində bildirib.
Hakimiyyət orqanlarının göstərdiyi səylərə, hökumətin artıq demoqrafik çətinlikləri həll etmək üçün külli miqdarda pul xərcləməsinə baxmayaraq, Cənubi Koreyada doğum səviyyəsi son illərdə nəzərəçarpacaq dərəcədə aşağı düşüb.
“Milli fövqəladə hal sayıla bilən aşağı doğum səviyyəsini aradan qaldırmaq üçün biz dövlətin bütün imkanlarını tam səfərbər edəcəyik”, deyə Yun Seok Yeol qeyd edib.
Hazırda Cənubi Koreya doğum səviyyəsi aşağı olsa da, ömür uzunluğunun ən yüksək olduğu ölkələr qrupuna daxildir. Əhalinin sayını indiki səviyyədə saxlamaq üçün 2,1 doğum əmsalı tələb olunsa da, doğum əmsalı (qadının həyatı boyu doğulması gözlənilən uşaqların sayı) 0,72-yə enib. Ekspertlərin proqnozlarına görə, indiki azalma tempi ilə 2100-cü ilə qədər respublika əhalisinin sayı indiki 51 milyondan 25 milyon nəfərə enəcək.
