Bakıda “BTB” Bankdan xüsusi külli miqdarda oğurluq etməkdə təqsirləndirilən şəxs Belarus vətəndaşı Babayev Aleksey Ramizoviçin və Rusiya vətəndaşı olan Qrinqeviç Sergey Oleqovicin cinayət işi üzrə növbəti məhkəmə prosesi keçirilib.
Bizim.Media xəbər verir ki, Bakı Ağır Cinayətlər Məhkəməsində hakim Mahirə Kərimovanın sədrliyi ilə keçirilən iclasda Aqşin Şirəliyev şahid qismində ifadə verib.
O, yalnız Sergeyi tanıdığını bildirib:
“2022-ci ilin sentyabr-oktyabr aylarında işlədiyim “Atlas” otelində gəlib qaldı. Bəzən yanına xanım gəlib-gedirdi. Orada bizim qeydiyyat şöbəsində işləyən şəxsin rus dili ilə bağlı problemi olduğuna görə müdaxilə etdim və tanış olduq. Sonra Serqey 2023-cü ilin yanvar ayında mənə dedi ki, bankda saxlanc yeşiyi almaq istəyirəm, mənə kömək et. Mən də BTB banka gəlib, saxlanc yeri almağa ona kömək elədim.
Aylığı 40 manat olmaqla 3 aylıq saxlanc yeşiyi götürdü və dedi ki, mən bu yeşiklərə sənəd qoyacam. Mənə 3 aylıq etibarnamə verdi, mən də ona bu saxlanc yeşiyini götürməyə kömək etdim, yəni seyflər mənim icarəmdə oldu. Bu həmin banka ilk və axırıncı gəlişim oldu. Mən Serqey deyənə kimi bilmirdim ki, banklarda saxlanc yeşiyi olur. Onun qaldığı otaqda seyf var idi, ancaq o etibar etmədiyindən həmin seyfi istəmədi. Serqey mənə deyirdi ki, Bakıda bahalı obyektlərin tapılıb icarəyə verilməsi ilə məşğulam. Onunla tutulan şəxsin isə bir dəfə bu oğurluq hadisəsi olanda Xətai Rayon Polis İdarəsində görmüşəm”.
Vəkil vəsatət verərək xətşünaslıq ekspertizasının keçirilməsini istəyib.
Dövlət ittihamçısı Fuad Musayev vəsatətlərin təmin olunmasına münasibət bildirərək qeyd edib ki, müşavirə vaxtı sübutlara qiymət verilməsi zamanı tədqiq edəcəklər.
Hakim vəsatətləri müzakirə edərək audio-video yazı ilə bağlı vəsatəti təmin etmədi, digər vəsatəti isə sənədlərin tədqiqi mərhələsinə saxladı.
Məhkəmə prosesi oktyabr ayının 31- nə kimi təxirə salındı.
Qeyd edək ki, hadisə ötən il martın 17-si saat 18:00 radələrində paytaxtın Xətai rayonu, Y.Səfərov küçəsi 21 saylı ünvanda Bank “BTB”-nin mərkəzi ofisində qeydə alınıb.
1976-cı il təvəllüdlü Babayev Aleksey Ramizoviç və Qrinqeviç Serqey Oleqoviç Bank “BTB”-dən müştərilərin depozit otağından ümumilikdə 800 min manata yaxın pul və qızıl zinyət əşyaları oğurlamaqda şübhəli bilinirlər. Onlara qarşı ilkin olaraq Xətai Rayon Polis İdarəsində Cinayət Məcəlləsinin 177.4-cü (xüsusilə külli miqdarda oğurluq etmə) maddəsi ilə ittiham irəli sürülüb.
