Son bir ildə Ukraynada dron istehsalı yüz dəfə artıb, 200-dən çox şirkət pilotsuz təyyarələr hazırlamağa başlayıb.
Tribunainfo.az xəbər verir ki, bu barədə Baş nazir Denis Şmıqal Ali Radada “Hökumət üçün suallar saatı”nda danışıb.
Baş nazir qeyd edib ki, Ukrayna hərbi-sənaye kompleksinin inkişafına yanaşmalar kökündən dəyişdirilib. Müasir korporativ idarəetmə standartlarına uyğun olaraq “Ukroboronprom”un bazasında yeni şirkət yaradılıb.
“İndi pilotsuz uçan aparatın istehsalından onun alınmasına qədər olan yol kifayət qədər qısadır. İl ərzində dron istehsalı yüz dəfə artıb. 200-dən çox Ukrayna şirkəti dronların hazırlanmasına başlayıb”, – Şmıqal bildirib.
Bundan əlavə, hökumətin prioritetlərindən biri sürətli bərpa proqramını həyata keçirməkdir. 2023-cü ildə müxtəlif yenidənqurma proqramları üçün Silahlı Təcavüzün Nəticələrinin Aradan Qaldırılması Fondundan 62,3 milyard UAH ayrılıb.
“Hökumət tərəfindən təqdim edilən elektron yeniləmə proqramı fəal şəkildə həyata keçirilir. 16 min ukraynalı ailənin evlərinin təmiri üçün ödənişlər razılaşdırılıb. Evləri tamamilə dağılmış şəxslərə mənzil sertifikatları verilir”, – Şmıqal qeyd edib.
Əlavə edilir ki, hökumət humanitar minatəmizləmə bazarının işə salınması üzərində də işləyir. 2024-cü il dövlət büdcəsində humanitar minatəmizləmə üçün 2 milyard UAH ayrılır.
