“Siyasi partiyalarla görüşlərimiz keçir. “Mənim Səsim” Seçki Monitorinq Koalisiyası 533 nəfər müşahidəçi hazırlayıb. 67 dairəni əhatə edəcəklər. Bu il həm müxalifət, həm də iqtidar seçkilərdə daha aktiv iştirak edirlər. Xoşuma gəldi ki, Müsavat Partiyasından seçkilərdə namizəd kimi bu dəfə qadınlar, professorlar çoxdur. Digər partiyalarda da fəalıq müşahidə edirik. Qapı-qapı gəzirlər, insanlarla görüşürlər. Əlbəttə, özünə arxayınlar da var, onları demirəm. Amma birinci dəfədir ki, milləti belə sayan var. Bu dəfə hər bir namizəd millətdən asılı olduğunu başa düşür. Yəni onun səsi bu insanlardan gələcək. Ən dəyərlisi isə budur ki, ilk dəfədir, bütöv, müstəqil Azərbaycan üzrə seçkilər keçiriləcək. Bu, Azərbaycan üçün böyük uğur, başucalığıdır. Hətta İtaliya qəzeti yazıb ki, yeganə dövlətdir ki, konflikdə qalib gəlib, öz torpaqlarını qaytarıb, bütün torpaqlarda seçki keçirir. Bu da çox vacib idi, bütün ölkə ərazisində birinci dəfədir, prezident və parlament seçkiləri keçirilir”.
Bu sözləri Pravda.az-a müsahibəsində hüquq müdafiəçisi Novella Cəfəroğlu deyib.
“ATƏT-dən gələn nümayəndələrlə 4-5 dəfə görüşümüz olub. Seçkiqabağı da, təşviqat zamanı da. Ümidvaram ki, seçkidən sonra da Koalisiyamız hamısı ilə görüşəcək. Yəni biz işimizi görürük. Rayonlarda təlimatlar aparırıq. Məsələn, bu yaxınlarda Masallı, Lənkəran, Cəlilabad, Yardımlı – hamısında təlimatlar keçiririk. Seçkidə davranış qaydaları barədə təlimat kitabçaları hazırlamışıq. Bu dəfə MSK da çox gözəl işlədi. Bir neçə nəfərə qarşı düzgün hərəkət etməyiblər. Onu da araşdırırlar. Müxalifət, iqtidar – kim ərizəsini veribsə, hamısını qeydə alıblar. Sadəcə, beşə yaxın adam iradını bildirdi, lakin MSK açıqladı ki, sənədləri düzgün deyildi. Amma bilirəm ki, aralarından bir nəfər işi məhkəməyə versəydi, qalib gələrdi. Çünki özü vəkildir, işini çox gözəl bilir. Bizə bəzi namizədlər zəng edirlər ki, icra hakimiyyətləri insanlarla görüşməyə məhdudiyyətlər yaradırlar. Belə xırda məsələlər var, onu da həll edirik. MSK-ya, Prezident Administrasiyasına zəng edirik, gücümüz çatan qədər məlumat veririk. Amma deyim ki, belə hal çox azdır. Biz buradan gedib namizədlərin plakatını qoruyamayacağıq ki. Kim plakatlarını cırıbsa, onu məhkəməyə versinlər. Müxalifətdən heç kim hələ zəng edib deməyib ki, məhdudiyyət yaradırlar”, – o bildirib.
N.Cəfəroğlu bəzi iradlar da səsləndirib: “Bizim iradımız budur ki, namizədlər arasında debat olmadı. Televiziyaları da qınayıram. Bu seçkilərdə çox az təbliğat getdi. Hələ indi nəsə deməyə başlayıblar. Halbuki cənab Prezident seçki ilə bağlı qərar verəndə məlumatların artıq hamısını televiziyada əhatəli işıqlandırmalı idilər. Qanunda var ki, 60-dan çox namizədi olan partiya televiziya kanalında pulsuz çıxış edə bilər. YAP böyük partiyadır, 125 nəfərlik siyahı verib. Buna görə də qanunda dəyişiklik etmək lazımdır ki, 25 nəfərə qədər namizəd irəli sürən partiya televiziyada pulsuz çıxış etməlidir”.
Təşviqat kampaniyası çəçivəsində namizədliyini geri çəkənlər barədə də fikir bildirib: “Axıra qədər mübarizə aparmaq lazımdır. Özündə güc tapıb təşviqata qoşulmusansa, axıra qədər davam et. 5% səs topla, amma özünü yoxla, sonra analiz et. Hakim partiya güclüdürsə, onda mübarizə apar, rəqibinin əlindən bayrağı al. Bu, söz gəzdirməkdir. Gedirsənsə, axıra qədər getməlisən”.
