Ötən gün Ermənistanın baş naziri Nikol Paşinyan brifinqdə bir sıra açıqlamalar verib.
Tribunainfo.az xəbər verir ki, o, 10 noyabr razılaşmasının arxivə getdiyini, Azərbaycanla danışıqları isə sentyabrın 8-dən etibarən start götürəcəyini, habelə İsrailin qondarma “erməni soyqırımı”nı tanımasına mənfi münasibət sərgilədiyini bildirib.
Məsələni saytımıza şərh edən siyasi şərhçi Fikrət Fəraməzoğlu Paşinyanın mövcud vəziyyətə adekvat addım atdığını deyib. O bildirib ki, əsas məsələ sentyabrın 8-də başlayacaq danışıqlardır. “Bakı ilə İrəvan arasında Vaşinqton razıllaşmasına əsasən birbaşa danışıqların sentyabrda başlaması müsbət haldır. Bu uzun illərdən bəri mövcud olan problemin aradan qalxmasına kömək edəcək”.
Ekspert həmin danışıqlarda müzakirə olunacaq məsələlərə diqqət çəkib. Fəraməzoğlu bildirib ki, həmin danışıqların ilk raundu sərhədlərin demarkasiyası ilə bağlı ola bilər. “İstər Ermənistan, istərsə də Azərbaycan sərhədlərin demarkasiyasını daha çox istəyirlər. Hətta Ermənistanın xarici işlər naziri Mirzoyan son açıqlamasında bu prosesin sülh sənədinin imzalanması və Zəngəzur dəhlizinin açılmasında müstəsna rolunun olduğunu qeyd edib. Böyük ehtimalla ilk müzakirə mövzusu sərhədlərlə əlaqəli olacaq”.
O sərhədlərin demarkasiyasından sonra hansı ərazilərin geri veriləcəyini də təxmin etdiyini vurğulayıb. “Ermənistan Tovuzda və Gədəbəydə ərazilərinin olduğunu iddia edir. Söhbət Tovuz istiqamətində 10 min hektar əkin sahəsindən və Başkənddən gedir. Azərbaycan bu əraziləri geri qaytarmayacaq. Heç Ermənistan da onları almaq üçün ciddi cəhd etməyəcək. Lakin Azərbaycanın bu gün Ermənistan işğalında olan bir neçə kəndi var. Bu danışıqlarda Kərki və Yuxarı Əskipara kəndlərinin geri qaytarılması məsələsi qaldırılacaq. Düşünmürəm ki, İrəvan buna əks mövqe nümayiş etdirsin. Bunun üçün nə gücü, nə də imkanı var”.
Fəraməzoğlu sentyabr müzakirələrində Zəngəzur dəhlizi və kommunikasiyaların açılması məsələsini də müzakirə ediləcəyini düşünür. “Vaşinqtonda əsas vurğu məhz dəhliz məsələsi üzərindəydi. Azərbaycan kommunikasiyaların açılmasında maraqlı olduğunu və bunun tez zamanda başlamasını təkid edir. Ermənistan isə yolların açılmasına qarşı olmadığını, lakin tikinti işləri aparmağın vaxt apara biləcəyini qeyd edir. Güman ki, erməni tərəfi dəmir və avtomobil yolunun ABŞ-ın maliyyəsi hesabına inşa edilməsi üçün fürsət axtarır. Elə prosesin yubanması da bununla bağlıdır. Amma bütün hallarda bu danışıqların əsas predmetlərindən biri olacaq”.
Fərda Uğur
