50 yaşlı Rəsmiyə Vəliyeva uzun illər ürək xəstəliyindən əziyyət çəkib. Həkimlər ona əməliyyatın riskli olduğunu, 2 ay ömrü qaldığını bildiriblər.
Virtualaz.org Türkiyə mətbuatına istinadən xəbər verir ki, Türkiyədə əməliyyat olunan Vəliyeva ölümün pəncəsindən xilas edilib. Türkiyənin Erzincan vilayətindəki xəstəxanaların birində qadının 3 damarında şuntlama əməliyyatı aparılıb.
Rəsmiyə Vəliyeva bildirib ki, tanışlarının vasitəsilə Türkiyəyə gedib. “Analizlərin nəticələrini Erzincandakı ürək-damar cərrahına göndərdik. Həkim bizi Türkiyəyə dəvət etdi. Əməliyyat edilərək ölümün pəncəsindən xilas oldum”, – Vəliyeva əlavə edib.
Xəstənin bacısı Şəlalə Əhmədova isə bildirib ki, Azərbaycanda yaşama şansının az olduğunu deyəndən sonra xaricdə həkim axtarıblar və Türkiyə həkimlərinə etibar ediblər.
