“ATEF Şirkətlər Qrupu” Məhdud Məsuliyyətli Cəmiyyəti (MMC) gömrük qaydaları əleyhinə olan (Gömrük təminatının pozulması) inzibati xəta protokolu tərtib olunub.
Qaynarinfo-nun məlumatına görə, “ATEF Şirkətlər Qrupu”na eyni maddə ilə ayrı-ayrılıqda iki protokol tərtib edilib.
Protokollar İnzibati Xətalar Məcəlləsinin 492.1-ci maddəsi ilə irəli sürülüb.
İnzibati Xətalar Məcəlləsinin 492.1-ci maddəsinə əsasən, gömrük təminatının, yəni mallara və ya nəqliyyat vasitələrinə müvafiq icra hakimiyyəti orqanının tətbiq etdiyi plomb, möhür və digər eyniləşdirmə vasitələrinin həmin orqanın icazəsi olmadan dəyişdirilməsinə, qəsdən məhv edilməsinə, qırılmasına, zədələnməsinə və ya itirilməsinə görə fiziki şəxslər 400 manat, vəzifəli şəxslər 600 manat, hüquqi şəxslər 1000 manat məbləğində cərimə edilir.
Hər iki işə Suraxanı Rayon Məhkəməsində baxılacaq.
“ATEF Şirkətlər Qrupu”nun Müşahidə Şurasını sədri Talıb Əlixanbəyovdur. Onun Dövlət Gömrük Komitəsinin sabiq sədri, general-polkovnik Səfər Mehdiyevlə dostluq münasibətlərinin olduğu deyilir. Səfər Mehdiyevin vəzifədən getməsindən sonra şirkətdə ciddi maliyyə problemləri yaranıb.
Şirkətin Müşahidə Şurasını sədri Talıb Əlixanbəyov olsa da, qurumun qanuni təmsilçisi, onun oğlu Əlixanbəyov Emil Talıb oğludur.
Şirkətin hazırda İqtisadiyyat Nazirliyi yanında Dövlət Vergi Xidmətinin Milli Gəlirlər Baş İdarəsinə 792456.34 manat vergi borcu var. Ötən il bu borcun məbləği 11 milyon manata yaxın olub.
