Avropa Komissiyası Rusiyaya məxsus dondurulmuş 200 milyard avroya yaxın aktivlərin Ukraynanın bərpası üçün istifadəsi üzərində işləyir. Tribunainfo.az Politico-ya istinadən xəbər verir ki, Brüssel bu vəsaitlərin daha riskli, lakin gəlirli fonda yönləndirilməsini nəzərdən keçirir. Məqsəd həm Ukraynaya əlavə maliyyə təmin etmək, həm də Moskvaya təzyiqi artırmaqdır.
Avqustun 30-da Aİ ölkələrinin xarici işlər nazirləri Kopenhagendə keçiriləcək qeyri-rəsmi görüşdə bu məsələni müzakirə edəcəklər.
Mövzu Avropa daxilində fikir ayrılığı yaradıb: Baltikyanı ölkələr və bir sıra şərq dövlətləri aktivlərin tam müsadirəsini tələb edirlər. Almaniya, İtaliya və xüsusilə də Belçika isə buna qarşı çıxır. Belçikanın narahatlığı ondan ibarətdir ki, ölkədə yerləşən Euroclear təşkilatında Rusiyaya məxsus vəsaitlərin əsas hissəsi saxlanılır və bu qərar ciddi hüquqi və maliyyə riskləri doğura bilər.
Ekspertlərin fikrincə, Ukrayna 2026-cı ildə təxminən 8 milyard avroluq büdcə kəsiri ilə üzləşəcək və Aİ yeni maliyyə mənbələri axtarmağa məcburdur.
İmran Kərimli
