Türkiyə İsveçin NATO üzvlüyünə “hə” dedikdə gözlər ABŞ-a çevrildi. Bəs Konqres Türkiyənin F-16 tələbini təsdiq edəcəkmi?
Tribunainfo.az CNN-ə istinadən xəbər verir ki, 2021-ci ilin oktyabr ayında Türkiyə ABŞ-dan 40 ən yüksək səviyyəli F-16 bloku 70 döyüş təyyarəsi və 79 modernizasiya dəsti almaq üçün müraciət məktubu göndərib.
O vaxtdan bəri tələblə bağlı ABŞ administrasiyasından müsbət mesajlar alsa da, Konqresdən konkret addım atılmayıb və satışla bağlı hər hansı bir inkişaf olmayıb. Ancaq Türkiyənin İsveçin NATO-ya üzvlüyünə viza verməsinin yaratdığı müsbət atmosfer bu vəziyyəti tərsinə çevirə bilər.
Ankaranın İsveç qərarından sonra ABŞ F-16-ların Türkiyəyə satışı və modernləşdirilməsi ilə bağlı yaxın günlərdə addımların atıla biləcəyi mesajını paylaşıb. ABŞ-ın milli təhlükəsizlik müşaviri Cek Sallivan, prezident Co Baydenin F-16 transferini dəstəklədiyini açıq şəkildə söyləyib.
Bundan əlavə, bu prosesdə milli müdafiə naziri Yaşar Gülər amerikalı həmkarı Ostin ilə görüşüb. Görüşdə Türkiyənin F-16 tələbi müzakirə edilib. ABŞ-dan müsbət mesajlar gəlsə də, Türkiyənin F-16 tələbi ilə bağlı qərarının təqvimi hələ də bəlli deyil.
Türkiyənin F-16 tələbinin maliyyə dəyərinin 20 milyard dollar olduğu təxmin edilir. ABŞ müdafiə sənayesi üçün əhəmiyyətli olan bu razılaşma NATO-nun ən mühüm güclərindən biri olan Türkiyənin hava gücünün qorunması baxımından da kritikdir.
Türkiyə bu müqavilə ilə hava donanmasını yeniləməyi hədəfləyir. Bundan əlavə, ABŞ-ın Yunanıstana F-35 döyüş təyyarələri satması gündəmdə olarkən, bu razılaşma iki qonşu arasında balansın qorunması istiqamətində də ön plana çıxır.
